1989లో షూట్‌ కంప్లీట్.. ఇప్పుడు రజనీకాంత్ సినిమా విడుదల..!

రజనీకాంత్, శత్రుఘ్న సిన్హా, హేమమాలిని, అమ్రిష్ పురి, జగదీప్ వంటి దిగ్గజ నటులు కలిసి నటించిన 'హమ్ మే షాహెన్‌షా కౌన్' అనే హిందీ చిత్రం ఎట్టకేలకు విడుదలకు నోచుకుంది. ఈ సినిమాను ఆధునిక సాంకేతికతతో ప్రేక్షకుల ముందుకు తీసుకువస్తున్నారు. రాజా రాయ్ నిర్మించిన ఈ చిత్రానికి హర్మేష్ మల్హోత్రా దర్శకత్వం వహించారు. సలీం-ఫైజ్ సంభాషణలు, లక్ష్మీకాంత్-ప్యారేలాల్ సంగీతం, ఆనంద్ బక్షి సాహిత్యం, సరోజ్ ఖాన్ కొరియోగ్రఫీ అందించారు. 35 ఎంఎం ఈస్ట్‌మన్ కలర్‌పై చిత్రీకరించినప్పటికీ, అప్పట్లో ఈ సినిమా సెన్సార్‌కు వెళ్లకపోవడంతో విడుదల ఆగిపోయింది.

నిర్మాత రాజా రాయ్ జీవితంలో ఎదురైన ఓ పెను విషాదం సినిమా విడుదలవ్వకుండా చేసింది. సినిమా చిత్రీకరణ పూర్తయ్యాక లండన్‌కు వెళ్లిన ఆయన, అక్కడ తన చిన్న కుమారుడిని కోల్పోయారు. ఈ బాధ నుంచి కోలుకోలేక సినిమా పనులను పక్కన పెట్టేశారు. ఆ తర్వాత కొన్నేళ్లకు దర్శకుడు హర్మేష్ మల్హోత్రా కూడా కన్నుమూయడంతో ప్రాజెక్ట్ పూర్తిగా నిలిచిపోయింది. ఇప్పుడు ఏఐ టెక్నాలజీతో విజువల్స్, ఆడియో నాణ్యతను మెరుగుపరిచామని, 4K రిజల్యూషన్‌తో పాటు 5.1 సరౌండ్ సౌండ్‌తో సినిమాను సిద్ధం చేశామని అసోసియేట్ ప్రొడ్యూసర్ అస్లాం మీర్జా తెలిపారు. 1989లో చిత్రీకరించబడిన ఈ చిత్రం 37 సంవత్సరాలుగా విడుదల కాలేదు. ఇప్పుడు చివరకు థియేటర్లలో విడుదలకు సిద్ధంగా ఉంది.