నెల రోజుల పాటు మైనర్ బాలికపై ముగ్గురు సామూహిక అత్యాచారం.. ఆ తర్వాత పొలాల్లో

మైనర్‌ బాలికపై సామూహిక అత్యాచారం చేసిన ఉదంతం బీహార్‌లోని బెట్టియా ప్రాంతంలో వెలుగు చూసింది. బెట్టియాలోని గోనాహా పోలీస్ స్టేషన్ పరిధిలో నెల రోజులుగా ఓ బాలికపై యువకులు సామూహిక అత్యాచారానికి పాల్పడ్డారు. గోనాహా పోలీస్‌స్టేషన్‌ పరిధిలోని ఓ గ్రామంలో మలవిసర్జనకు వెళ్లిన మైనర్‌ బాలికను అదే గ్రామానికి చెందిన ముగ్గురు యువకులు కిడ్నాప్‌ చేశారు. అక్కడి నుండి ఉత్తరప్రదేశ్‌లోని గోరఖ్‌పూర్‌కు తీసుకెళ్లి నెల రోజుల పాటు సామూహిక అత్యాచారానికి పాల్పడ్డారు. బాలిక తప్పించుకునేందుకు ప్రయత్నించగా మళ్లీ వారికే దొరికింది.

ఆ తర్వాత ఆమెను కిడ్నాపర్లు భయపెట్టి ఆమె ఇంటి పెరట్లోని పొలాల్లోకి తోసేశారు. అక్టోబరు 7వ తేదీన ఆమె కిడ్నాప్ అయినట్లు తెలుస్తోంది. అదే గ్రామానికి చెందిన అనిల్‌తో పాటు ముగ్గురు యువకులు తనను కిడ్నాప్ చేసి నోటికి చేతులు కట్టేసి ఒక టెంపోలో నర్కటియాగంజ్ స్టేషన్‌కు తీసుకెళ్లారని బాధితురాలు పోలీసులకు తెలిపింది. అనంతరం ముగ్గురు కలిసి ఆమెను కొట్టి మత్తు మందు ఇచ్చారు. ఆమె స్పృహలోకి వచ్చేసరికి గోరఖ్‌పూర్‌లో ఉంది. దీంతో ముగ్గురు కలిసి ఆమెను ఓ గదిలో బంధించి నెల రోజుల పాటు అత్యాచారం చేశారు.

ఆదివారం ముగ్గురు అబ్బాయిలు బయటకు వెళ్లగా, అవకాశం చూసి అక్కడి నుంచి పారిపోయానని బాలిక తెలిపింది. ఆమె బయటకు రాగానే ఓ వ్యక్తి ఆమెను బస్సు ఎక్కించాడు. అయితే ఆమె నార్కటియాగంజ్ చేరుకోగానే ముగ్గురు దుండగులు ఆమెను అక్కడ కూడా పట్టుకున్నారు. ఆ తర్వాత దుండగులు ఆమెకు మత్తుమందు ఇచ్చి ఇంటి పెరట్లోని వరి పొలంలో పడేసి పరారయ్యారు. ప్రస్తుతం పోలీసులు కేసు దర్యాప్తు చేస్తున్నారు.