కాబోయే అల్లుడితో పారిపోయిన అత్త.. కారణం ఇదేనంట..!

తన కూతురికి కాబోయే భర్తతో యూపీలోని అలీఘర్ లో ఓ మహిళ పారిపోయింది. స్వప్న అనే మహిళ తనకు కాబోయే అల్లుడు రాహుల్ తో వెళ్లిపోయింది. తాజాగా స్వప్న, రాహుల్ పోలీసుల ముందుకు వచ్చారు. ఇద్దరూ పారిపోవడానికి గల కారణాలను వారు వివరించారు. తన భర్త బాగా తాగి వచ్చి తనను కొట్టేవాడని, తన కూతురు కూడా తనతో తరచుగా గొడవలు పడేదని స్వప్న ఆరోపించింది. అందుకే రాహుల్ తో వెళ్లాలని నిర్ణయించుకున్నానని చెప్పింది. తాను అతడినే పెళ్లి చేసుకుంటానని, అతనితోనే ఉంటానని తెలిపింది. తన కుటుంబ సభ్యులు చెబుతున్నట్టు తాను రూ. 4 లక్షల డబ్బులు, రూ. 5 లక్షలు విలువ చేసే బంగారం తీసుకెళ్లలేదని, తన మొబైల్ ఫోన్, రూ. 200 మాత్రమే తీసుకెళ్లానని వివరించింది.

అలీఘర్ బస్టాండ్ కు రాకపోతే ప్రాణాలు తీసుకుంటానని స్వప్న బెదిరించిందని, అందుకే తాను వెళ్లానని రాహుల్ చెప్పాడు. తొలుత తాము లక్నోకు వెళ్లామని, అక్కడి నుంచి ముజఫర్ నగర్ కు వెళ్లామని తమ గురించి పోలీసులు వెతుకుతున్నారనే వార్త తెలిసిన తర్వాత వెనక్కి వచ్చేశామని రాహుల్ తెలిపాడు. స్వప్నను పెళ్లి చేసుకుంటానని రాహుల్ పోలీసుల ముందే హామీ ఇచ్చాడు.