అక్క‌డి మందు ఇక్క‌డికి తీసుకొచ్చి అమ్ముతున్నారు.. 154 బాటిళ్లు స్వాధీనం..

నాన్ డ్యూటీ పెయిడ్ లిక్కర్ (ఎన్‌డిపిఎల్)ని మధ్యప్రదేశ్ నుండి తెలంగాణ రాష్ట్రానికి అక్రమంగా తరలిస్తున్న ఆరుగురిని తెలంగాణ పోలీసు ప్రత్యేక టాస్క్ ఫోర్స్ (ఎస్‌టిఎఫ్) విభాగం సోమవారం నాడు అరెస్టు చేసింది. స్మగ్లర్ల నుంచి రూ.2.5 లక్షల విలువైన 154 మద్యం బాటిళ్లను ఎస్టీఎఫ్ స్వాధీనం చేసుకుంది. దీంతో పాటు రెండు బైక్‌లు, ఒక కారు, ఆరు మొబైల్ ఫోన్‌లను కూడా స్వాధీనం చేసుకున్నారు. అరెస్టయిన వారిని తరుణ్ వర్మ, రవీందర్ గౌడ్, కె సురేందర్ రెడ్డి, క్రాంతి, నాగరాజు, వెంకీగా పోలీసులు గుర్తించారు.

విశ్వసనీయ సమాచారం మేరకు పలు చెక్‌పోస్టుల్లో తనిఖీలు నిర్వహించామని ఎక్సైజ్ సూపరింటెండెంట్ అంజిరెడ్డి తెలిపారు. పెద్ద మొత్తంలో నాన్ డ్యూటీ పెయిడ్ లిక్కర్‌ను అక్రమంగా తరలిస్తున్న తరుణ్ వర్మ అనే స్మగ్లర్‌ను చెంగిచెర్ల వద్ద అరెస్టు చేశామని అంజిరెడ్డి తెలిపారు. అతని కారులో 40 మద్యం బాటిళ్లను స్వాధీనం చేసుకున్నారు. విచారణలో తరుణ్ వర్మ వెల్లడించిన సమాచారం మేరకు సురేందర్ రెడ్డి అనే మరో వ్యక్తి నుంచి మద్యం స్వాధీనం చేసుకున్నట్లు ఎక్సైజ్ సూపరింటెండెంట్ తెలిపారు.