లెక్చరర్‌ లైంగిక వేధింపులు.. కాలేజీలోనే నిప్పంటించుకున్న విద్యార్థిని
ఒడిశాలోని బాలాసోర్‌లోని ఒక కళాశాలలో అండర్ గ్రాడ్యుయేట్ విద్యార్థిని.. కళాశాల ప్రిన్సిపాల్ చాంబర్ ముందు ఆత్మహత్యకు ప్రయత్నించి ప్రాణాలతో పోరాడుతోంది.
By అంజి
లెక్చరర్‌ లైంగిక వేధింపులు.. కాలేజీలోనే నిప్పంటించుకున్న విద్యార్థిని
ఒడిశాలోని బాలాసోర్‌లోని ఒక కళాశాలలో అండర్ గ్రాడ్యుయేట్ విద్యార్థిని.. కళాశాల ప్రిన్సిపాల్ చాంబర్ ముందు ఆత్మహత్యకు ప్రయత్నించి ప్రాణాలతో పోరాడుతోంది. నెలల తరబడి వేధింపులను నిరసిస్తూ ఆమె కళాశాల ప్రిన్సిపాల్ చాంబర్ ముందు ఆత్మహత్యకు ప్రయత్నించింది. ఫకీర్ మోహన్ అటానమస్ కాలేజీ నుండి బి ఎడ్ కోర్సు చదువుతున్న ఆ విద్యార్థినికి 90 శాతానికి పైగా కాలిన గాయాలు అయ్యాయి. ప్రస్తుతం ఎయిమ్స్ భువనేశ్వర్‌లో క్రిటికల్ కేర్ పొందుతోంది. ఆమెను రక్షించడానికి ప్రయత్నించిన మరో విద్యార్థినికి కూడా తీవ్ర కాలిన గాయాలు అయ్యాయి. ఇంటిగ్రేటెడ్ బి.ఎడ్. విభాగాధిపతి సమీర్ కుమార్ సాహూ నిరంతర లైంగిక వేధింపుల కారణంగా ఆ మహిళ విద్యార్థిని వారాల తరబడి మానసికంగా బాధపడుతోందని తోటి విద్యార్థులు తెలిపారు. సాహూ పదే పదే అనుచిత డిమాండ్లు చేశాడని, ఆమె అంగీకరించకపోతే విద్యాపరమైన పరిణామాలు ఉంటాయని బెదిరించాడని బ్యాచ్‌మేట్స్ ఆరోపించారు.
కళాశాల ప్రిన్సిపాల్, స్థానిక పోలీసులకు అధికారికంగా ఫిర్యాదులు చేసినప్పటికీ, ఎటువంటి చర్యలు తీసుకోలేదని తెలుస్తోంది. అంతర్గత కమిటీని ఏర్పాటు చేసినప్పటికీ, అది పెద్దగా పురోగతి సాధించలేదని విద్యార్థులు తెలిపారు. కళాశాల ప్రిన్సిపాల్‌ను కలిసిన కొద్దిసేపటికే ఆ విద్యార్థిని తనను తాను నిప్పంటించుకుంది. ఈ సంఘటన నేపథ్యంలో, ఒడిశా ఉన్నత విద్యా శాఖ వేగంగా క్రమశిక్షణా చర్యలు తీసుకుంది. విభాగాధిపతి సమీర్ సాహూను అరెస్టు చేశారు. ప్రిన్సిపాల్ దిలీప్ కుమార్ ఘోష్‌ను సస్పెండ్ చేశారు. ఒడిశా ఉన్నత విద్యా మంత్రి సూర్యబన్షి సూరజ్ ఈ పరిణామాలను ధృవీకరిస్తూ, "రాష్ట్ర ప్రభుత్వం ఈ విషయాన్ని తీవ్రంగా పరిగణించింది. శాఖ డైరెక్టర్ అధ్యక్షతన, జాయింట్ సెక్రటరీ స్థాయి మహిళా అధికారి, మరొక కళాశాల నుండి సీనియర్ మహిళా ప్రిన్సిపాల్‌తో కూడిన కమిటీతో ఉన్నత స్థాయి విచారణ ప్రారంభించబడింది" అని అన్నారు.
విచారణ పూర్తయిన తర్వాత కఠిన చర్యలు తీసుకుంటామని మంత్రి తెలిపారు. "ఆమెకు తక్షణ, అధునాతన చికిత్స కోసం నేను ఎయిమ్స్ భువనేశ్వర్ అధికారులతో మాట్లాడాను. ముఖ్యమంత్రితో కూడా ఈ విషయం గురించి చర్చించాను" అని ఆయన అన్నారు. ప్రాథమిక విచారణ తర్వాత హెచ్‌ఓడి సమీర్ సాహూను అరెస్టు చేసి కోర్టుకు తరలించినట్లు బాలాసోర్ ఎస్పీ రాజ్ ప్రసాద్ తెలిపారు. "మేము సమగ్ర దర్యాప్తు ప్రారంభించాము. ఫోరెన్సిక్ బృందం రిపోర్ట్‌ తయారు చేస్తోంది కళాశాల అంతర్గత ఫిర్యాదుల కమిటీ నివేదిక కూడా పరిశీలనలో ఉంది. విద్యార్థి పరిస్థితి ఇంకా విషమంగా ఉంది. ప్రతి కోణాన్ని పరిశోధించడానికి బహుళ బృందాలను ఏర్పాటు చేసాము. కేసును త్వరలో ముగించాలని మేము ఆశిస్తున్నాము" అని ఆయన అన్నారు.
