హాయ్ బేబీ.. నువ్వు ఇది చదివే సమయానికి నేను వెళ్ళిపోయి ఉంటాను

ముంబైకి చెందిన 41 ఏళ్ల యానిమేటర్ ఒక హోటల్ గదిలో ఆత్మహత్య చేసుకుని మరణించాడు. తన భార్య, అత్త కారణంగా ఈ నిర్ణయం తీసుకోవాల్సి వచ్చిందని ఆరోపిస్తూ తన కంపెనీ వెబ్‌సైట్‌ నోట్‌లో పేర్కొన్నాడు. నిశాంత్ త్రిపాఠి కొన్ని రోజుల క్రితం విలే పార్లేలోని ఒక హోటల్‌లో ఉరివేసుకుని ప్రాణాలు వదిలాడు. భార్య అపూర్వ పరీక్ వేధింపుల కారణంగానే ఈ నిర్ణయం తీసుకున్నట్లు నిశాంత్ కుటుంబ సభ్యులు ఆరోపించారు.

నిషాంత్ తన భార్యను ఉద్దేశించి రాసిన నోట్‌లో .. "హాయ్ బేబీ, నువ్వు ఇది చదివే సమయానికి నేను వెళ్ళిపోయి ఉంటాను. నా చివరి క్షణాల్లో, జరిగిన ప్రతిదానికీ నేను నిన్ను ద్వేషించేవాడిని, కానీ నేను అలాంటి వాణ్ని కాను. నేను అప్పుడు నిన్ను ప్రేమించాను. ఇప్పుడు కూడా నేను నిన్ను ప్రేమిస్తున్నాను. నేను మాట ఇచ్చినట్లుగా నీ మీద నా ప్రేమ ఎప్పటికీ తగ్గదు." అని తెలిపాడు. "నేను ఎదుర్కొన్న ఇతర పోరాటాలన్నింటిలో, నువ్వు, ప్రార్థన మౌసి (అత్త) కూడా నా మరణానికి కారణమని నా తల్లికి తెలుసు. కాబట్టి, ఇప్పుడు ఆమెను సంప్రదించవద్దని నేను నిన్ను వేడుకుంటున్నాను. " అని అతను నోట్‌లో పేర్కొన్నాడు.

పాల్ఘర్ జిల్లాలో నివసించిన నిషాంత్ ఫిబ్రవరి 28న ఉరి వేసుకుని ఆత్మహత్య చేసుకోవడానికి మూడు రోజుల ముందు విలే పార్లేలోని సహారా హోటల్‌కు వెళ్లాడు. ఆత్మహత్య చేసుకునే ముందు, యానిమేటర్ తన గది తలుపు బయట "డిస్టర్బ్ చేయవద్దు" అనే బోర్డును ఉంచాడు. కాల్స్‌కు స్పందించకపోవడంతో, హోటల్ ఉద్యోగులు మాస్టర్ కీని ఉపయోగించి తలుపు తెరిచి చూడగా అతని మృతదేహం హుక్‌కు వేలాడుతూ కనిపించింది. ఆ తర్వాత హోటల్ సిబ్బంది పోలీసులకు సమాచారం అందించారు. దర్యాప్తులో, పోలీసులు బాధితుడి నోట్‌ను అతని కంపెనీ వెబ్‌సైట్‌లో కనుగొన్నారు.