ఆస్పత్రిలో వృద్ధ మహిళ రోగికి వేధింపులు.. వార్డ్ బాయ్ అరెస్ట్

దేశంలో మహిళలు, చిన్నారులపై వేధింపులు ఆగడం లేదు. తాజాగా మహారాష్ట్రలో దారుణ ఘటన జరిగింది. డోంబివిలి పట్టణంలోని ఓ ప్రైవేట్ ఆసుపత్రి వార్డ్ బాయ్‌ 75 ఏళ్ల వృద్ధురాలిపై వేధింపులకు పాల్పడ్డాడు. ఈ ఘటనలో పోలీసులు వార్డ్‌ బాయ్‌ని అరెస్టు చేసినట్లు అధికారి ఒకరు బుధవారం తెలిపారు. ఫిబ్రవరి 16 నుంచి 19వ తేదీ మధ్య తాను ఆసుపత్రిలో చికిత్స పొందుతున్నాని వృద్ధురాలు తెలిపింది. రామ్‌నగర్‌ పోలీస్‌ స్టేషన్‌కు చెందిన అధికారి ఈ కేసుకు సంబంధించిన వివరాలు వెల్లడించారు.

ఆస్పత్రిలోని ఎక్స్‌రే గదికి తీసుకెళ్లినప్పుడు నిందితులు తనను రెండు సార్లు వేధించారని మంగళవారం తన పోలీసు ఫిర్యాదులో వృద్ధ మహిళ పేర్కొంది అని అన్నారు. ఈ ఘటన గురించి మొదట్లో ఎవరికీ చెప్పని సదరు వృద్ధురాలు, ఆస్పత్రి నుంచి డిశ్చార్జి అయిన తర్వాత విషయాన్ని కుటుంబ సభ్యులకు చెప్పింది. ఆ తర్వాత ఆమె పోలీసులకు ఫిర్యాదు చేసింది. ఈ ఘటనపై కేసు నమోదు చేసిన పోలీసులు.. మంగళవారం నిందితుడిని అరెస్ట్ చేశారు. పోలీసులు అతనిపై ఇండియన్ పీనల్ కోడ్ సెక్షన్ 354 (వేధింపు) కింద కేసు నమోదు చేశారు. తదుపరి విచారణ సాగుతోంది.