రూ.1,800 కోట్ల విలువైన డ్రగ్స్ స్వాధీనం.. ఇద్దరి అరెస్ట్

నార్కోటిక్స్ కంట్రోల్ బ్యూరో (ఎన్‌సిబి), యాంటీ టెర్రరిజం స్క్వాడ్ (ఎటిఎస్) గుజరాత్ సంయుక్త ఆపరేషన్‌లో సుమారు రూ.1,800 కోట్ల విలువైన డ్రగ్స్‌ను స్వాధీనం చేసుకున్నాయి. మధ్యప్రదేశ్‌లోని భోపాల్‌ సమీపంలోని ఓ ఫ్యాక్టరీలో జరిపిన సోదాల్లో ఈ భారీ డ్రగ్స్‌ రవాణా బయటపడింది. ఈ దాడిలో ఫ్యాక్టరీలో తయారవుతున్న ఎండీ (మెఫెడ్రోన్) డ్రగ్స్‌ను స్వాధీనం చేసుకున్నారు. అక్రమంగా డ్రగ్స్ ఉత్పత్తి చేస్తున్న ఇద్దరు నిందితులను అధికారులు అరెస్ట్ చేశారు.

డ్రగ్స్‌పై పోరాటంలో భారీ విజయం సాధించారని గుజరాత్ మంత్రి హర్ష్ సంఘ్వీ అధికారులను ప్రశంసించారు. ''మాదకద్రవ్యాల అక్రమ రవాణా, దుర్వినియోగాన్ని ఎదుర్కోవడంలో మా చట్ట అమలు సంస్థల అవిశ్రాంత ప్రయత్నాలను ఈ విజయం ప్రదర్శిస్తుంది. మన సమాజం యొక్క ఆరోగ్యం, భద్రతను కాపాడటంలో వారి సహకార ప్రయత్నాలు చాలా కీలకమైనవి'' అని అన్నారు.

ఢిల్లీ పోలీసులు నగరంలో భారీగా డ్రగ్స్‌ స్వాధీనం చేసుకున్న దాదాపు వారం తర్వాత ఇది బయటపడింది. దక్షిణ ఢిల్లీలోని మహిపాల్‌పూర్‌లో దాదాపు రూ. 5,620 కోట్ల విలువైన 560 కిలోగ్రాముల కొకైన్, 40 కిలోల హైడ్రోపోనిక్ గంజాయిని స్వాధీనం చేసుకున్నారు. దేశ రాజధానిలో ఇప్పటివరకు జరిగిన అతిపెద్ద డ్రగ్స్‌ దందాగా ఈ దాడిని గుర్తించారు.