కర్నూలు జిల్లాలో దారుణం.. మహిళను కరెంట్ స్థంభానికి కట్టేసి

కర్నూలు జిల్లా పెద్దకడుబూరు మండలం కల్లుకుంటలో దారుణ ఘటన చోటు చేసుకుంది. గురువారం రాత్రి గ్రామస్థులు ఓ దళిత మహిళను విద్యుత్ స్తంభానికి కట్టేసి నిర్దాక్షిణ్యంగా కొట్టారు. దళిత మహిళ గోవిందమ్మ కుమారుడు ఈరన్న కొన్ని నెలల క్రితం అదే గ్రామానికి చెందిన నాగ లక్ష్మితో కలిసి పారిపోయాడు. లక్ష్మి వేరే కులానికి చెందిన అమ్మాయి. వారి కుటుంబ సభ్యులు పెళ్లికి నిరాకరించడంతో ఇద్దరూ ఊరు విడిచి వెళ్లిపోయారు. పారిపోయిన ఘటన తరువాత అమ్మాయి తల్లిదండ్రులు పంచాయతీకి పిలిచారు. అక్కడ అబ్బాయి తల్లిదండ్రులను గ్రామం వదిలి వెళ్ళమని ఆదేశించారు.

కానీ గోవిందమ్మ మాత్రం ఆ గ్రామంలోనే ఉంది. దీంతో ఇరువర్గాల మధ్య తరచూ గొడవలు జరుగుతుండేవి. గురువారం రాత్రి గోవిందమ్మ ఇంటిపై దాడికి పాల్పడిన బాలిక కుటుంబ సభ్యులు. వారు గోవిందమ్మను బయటకు లాగి, గ్రామంలోని విద్యుత్ స్తంభానికి కట్టేసి, పంచాయితీ తీర్పును ఉల్లంఘించినందుకు ఆమెను కొట్టడం ప్రారంభించారు. స్థానికులు అందించిన సమాచారంతో పెద్దకడుబూరు పోలీసులు సంఘటనా స్థలానికి చేరుకుని గోవిందమ్మను రక్షించారు.దళిత మహిళను కొట్టిన వీడియో సోషల్ మీడియాలో వైరల్‌గా మారింది. దీంతో దాడి చేసిన వారిపై కఠిన చర్యలు తీసుకోవాలని దళిత సంఘాలు డిమాండ్ చేస్తున్నాయి. పోలీసులు కేసు నమోదు చేసి దర్యాప్తు చేస్తున్నారు.