మహిళపై లైంగిక దాడి.. సహాయం కోసం కేకలు వేయ‌డంతో..

ఏప్రిల్ 2వ తేదీ తెల్లవారుజామున 1.30 గంటల ప్రాంతంలో బెంగళూరులోని కెఆర్ పురం రైల్వే స్టేషన్ సమీపంలో ఒక మహిళపై లైంగిక దాడి జరిగింది.

By Medi Samrat
Published on : 3 April 2025 8:37 PM IST

మహిళపై లైంగిక దాడి.. సహాయం కోసం కేకలు వేయ‌డంతో..

ఏప్రిల్ 2వ తేదీ తెల్లవారుజామున 1.30 గంటల ప్రాంతంలో బెంగళూరులోని కెఆర్ పురం రైల్వే స్టేషన్ సమీపంలో ఒక మహిళపై లైంగిక దాడి జరిగింది. కేరళలో ఉద్యోగం చేస్తూ బీహార్‌లోని తన స్వస్థలానికి తిరిగి వస్తున్న బాధితురాలు, తన బంధువుతో కలిసి స్టేషన్‌కు చేరుకుంది. ఎర్నాకుళం నుండి తన స్వస్థలానికి వెళ్లే ముందు బెంగళూరులో దిగింది. ఆమె తన బంధువుకు తాను బెంగళూరుకు చేరుకుంటున్నట్లు తెలిపింది. అతను ఆమెకు కెఆర్ పురం రైల్వే స్టేషన్‌లో దిగమని సూచించాడు.

వారిద్దరూ ఆహారం కోసం మహదేవపుర వైపు వెళుతుండగా, స్టేషన్ బయట ఆటోరిక్షాలో ఇద్దరు వ్యక్తులు వారి వద్దకు వచ్చారు. ఒక నిందితుడు ఆమె బంధువును అడ్డుకోగా, రెండవ నిందితుడు బాధితురాలిని నిర్మానుష్య ప్రాంతానికి లాక్కెళ్లి అత్యాచార యత్నం చేశాడని ఎఫ్.ఐ.ఆర్. లో ఆరోపించారు. సహాయం కోసం ఆ మహిళ కేకలు వేయడంతో స్థానికులు స్పందించి, నిందితులలో ఒకరిని పట్టుకోగలిగారు. ఆ తర్వాత అతన్ని పోలీసులకు అప్పగించారు. దర్యాప్తు తర్వాత ములాబాగిలు పట్టణానికి చెందిన ఆసిఫ్, సయ్యద్ ముషార్ అనే ఇద్దరు వ్యక్తులను అధికారులు అరెస్టు చేశారు. వైట్‌ఫీల్డ్ డిప్యూటీ కమిషనర్ ఆఫ్ పోలీస్ మాట్లాడుతూ, ఆసిఫ్‌పై లైంగిక వేధింపుల ఆరోపణలు ఉన్నాయని, సయ్యద్ ముషార్ బాధితురాలి బంధువును అడ్డుకున్నాడని ఆరోపించారు. కేసు నమోదు చేశామని దర్యాప్తు కొనసాగుతోందని పోలీసులు తెలిపారు.

Next Story