హీరోయిన్‌ను చేస్తానంటూ యువ‌తిపై దర్శకుడు లైంగిక వేధింపులు.. బెయిల్ మంజూరు చేయ‌లేమ‌న్న కోర్టు..!
ఓ యువ‌తిని సినిమాలో హీరోయిన్‌గా చేస్తానంటూ లైంగిక వేధింపులకు పాల్పడినట్లు ఆరోపణలు ఎదుర్కొంటున్న చిత్ర దర్శకుడి ముందస్తు బెయిల్ పిటిషన్‌ను ఢిల్లీ హైకోర్టు తిరస్కరించింది.
By Medi Samrat
ఓ యువ‌తిని సినిమాలో హీరోయిన్‌గా చేస్తానంటూ లైంగిక వేధింపులకు పాల్పడినట్లు ఆరోపణలు ఎదుర్కొంటున్న చిత్ర దర్శకుడి ముందస్తు బెయిల్ పిటిషన్‌ను ఢిల్లీ హైకోర్టు తిరస్కరించింది. అలాంటి కేసులో ముందస్తు బెయిల్ మంజూరు చేయడం సమాజానికి తప్పుడు సందేశాన్ని పంపుతుందని పేర్కొంది.
ఓ సినీ దర్శకుడు బాధితురాలిని హీరోయిన్‌ని చేస్తాననే సాకుతో ప్రలోభపెట్టి లైంగికంగా దోపిడీకి పాల్పడ్డాడనే ఆరోపణలున్నాయి. ఇది పిటిషనర్ అరెస్టు తర్వాత బెయిల్ కోరిన కేసు కాదని, ఒక సినీ దర్శకుడు దాఖలు చేసిన ముందస్తు బెయిల్ కేసు అని జస్టిస్ గిరీష్ కథ్‌పాలియాతో కూడిన ధర్మాసనం వ్యాఖ్యానించింది.
నటి కావాలనుకునే ఓ చిన్న పట్టణంలోని యువ‌తిపై పలుమార్లు లైంగిక వేధింపులకు పాల్పడినట్లు నిందితుడిపై ఆరోపణలు ఉన్నాయని ధర్మాసనం పేర్కొంది. ఇలాంటి కేసుల్లో ముందస్తు బెయిల్ మంజూరు చేయడం వల్ల సమాజానికి చాలా తప్పుడు సందేశం వెళ్తుందని కోర్టు పేర్కొంది.
బాధితురాలు ముందస్తు బెయిల్‌ను వ్యతిరేకించకపోవడంతో.. బెయిల్ మంజూరు చేయాలనే వాదనను కూడా కోర్టు తోసిపుచ్చింది. ఎఫ్‌ఐఆర్‌లోని నిర్దిష్ట వివరాల ఆధారంగా ఆరోపణలు తప్పుగా కనిపించడం లేదని కోర్టు పేర్కొంది.
మరోవైపు, మరో కేసులో, పాటియాలా హౌస్‌లోని అదనపు సెషన్స్ జడ్జి ఒక ఇండియన్ ఎయిర్‌ఫోర్స్ అధికారిని అత్యాచారం ఆరోపణల నుండి నిర్దోషిగా ప్రకటించారు. నిందితుడికి, బాధితురాలి మధ్య ప్రేమ వ్యవహారం నడుస్తోందని, అయితే పెళ్లి మాత్రం ఖరారు కాలేదని కోర్టు పేర్కొంది. 2018లో వసంత్ కుంజ్ పోలీస్ స్టేషన్‌లో ఎఫ్‌ఐఆర్ నమోదైంది. అదనపు సెషన్స్ జడ్జి పవన్ కుమార్ నిందితుడు ప్రమోద్ కుమార్‌ను నిర్దోషిగా విడుదల చేశారు.
