100 మందికి పైగా కాల్ డేటాను సేక‌రించిన 60 ఏళ్ల డిటెక్టివ్..!

ఢిల్లీలో దాదాపు 25 ఏళ్లుగా ప్రైవేట్ డిటెక్టివ్ ఏజెన్సీని నడుపుతున్న 60 ఏళ్ల వ్యక్తిని ఢిల్లీ పోలీసుల క్రైమ్ బ్రాంచ్ అరెస్టు చేసింది. ఆ వ్యక్తి అక్రమంగా కాల్ వివరాల రికార్డులను (CDR) సేకరించినందుకు అరెస్టు చేసినట్లు అధికారులు తెలిపారు. నిందితుడు తరుణ్ విన్సెంట్ డేనియల్‌ను రెండు మూడు సంవత్సరాల క్రితం గుర్గావ్‌కు చెందిన ఇద్దరు వ్యక్తులతో కలిసి సిడిఆర్ వివరాలను సేకరించారని ఎఫ్‌ఐఆర్ పేర్కొంది. అప్పటి నుండి అతను 100 మందికి పైగా అలాంటి రికార్డులను సేకరించాడు. పోలీసులు అతడిని రెడ్ హ్యాండెడ్‌గా పట్టుకున్నారు. డేనియల్ సహచరులను ఇంకా అరెస్టు చేయలేదని అధికారులు తెలిపారు.

జూన్ 29న, వికాస్ పురిలోని డిటెక్టివ్ ఏజెన్సీ అనధికారిక పద్ధతిలో కాల్ వివరాల రికార్డులను సేకరిస్తున్నట్లు క్రైమ్ బ్రాంచ్‌కు పక్కా సమాచారం అందింది. క్రైమ్ బ్రాంచ్ బృందం డేనియల్‌ను రెడ్ హ్యాండెడ్‌గా పట్టుకోవడానికి డేనియల్ ఏజెన్సీకి డెకాయ్ క్లయింట్‌ను పంపాలని నిర్ణయించింది. పోలీసులు డేనియల్‌ను ఒక నంబర్ కాల్ డేటా వివరాలను సేకరించమని కోరారు. రూ. 60,000 అవుతుందని డేనియల్ చెప్పాడు. రూ. 29,000 అడ్వాన్స్‌గా చెల్లించి, వివరాలను అతనికి అందించిన తర్వాత మిగిలిన మొత్తాన్ని చెల్లిస్తానని హామీ ఇచ్చాడు. జూలై 17న, డేనియల్ అతనికి వివరాలను బదిలీ చేశాడు. చెల్లించాల్సిన మిగిలిన డబ్బును ఇవ్వాలని అభ్యర్థించాడు. క్లయింట్ డబ్బును నగదు రూపంలో ఇస్తానని, మరుసటి రోజు ద్వారకా మోర్ మెట్రో స్టేషన్ దగ్గర కలవాలని డేనియల్‌ కు చెప్పాడు. ఇక జులై 18న డేనియల్‌ మెట్రో స్టేషన్‌కు రాగానే పోలీసులు అరెస్ట్‌ చేశారు. నిందితుడు తన ఆరోగ్యం, వయసు సాకుగా చూపాడు.. అతని సహచరుల గురించి మరింత సమాచారం ఇవ్వడానికి నిరాకరించాడని ఎఫ్‌ఐఆర్ పేర్కొంది. పోలీసులు అతని ఇంటి నుండి అతని ఫోన్‌ను స్వాధీనం చేసుకున్నారు. విచారణ కోసం డేనియల్‌ను క్రైమ్ బ్రాంచ్ పోలీస్ స్టేషన్‌కు తీసుకెళ్లారు.

విచారణ సందర్భంగా, రెండు మూడు సంవత్సరాల క్రితం గుర్గావ్‌లోని అనురాగ్, అర్జున్ అనే ఇద్దరు వ్యక్తులు తనను సంప్రదించారని, అనధికారిక పద్ధతిలో కాల్ వివరాల రికార్డులను సేకరించడంలో సహాయం చేయగలమని చెప్పారని డేనియల్ తెలిపాడు. దాదాపు 100 మంది ఖాతాదారులకు తాను అలాంటి వివరాలను అందించినట్లు డేనియల్ ఒప్పుకున్నాడు.