విభజన సమస్యల పరిష్కారంలో జాప్యం జ‌రుగుతుంది.. గ‌ట్టిగా డిమాండ్ చేయండి

సెప్టెంబర్ 3న తిరువనంతపురంలో జరగనున్న దక్షిణాది రాష్ట్రాల కౌన్సిల్ సమావేశంలో చర్చించాల్సిన అంశాలపై సీఎం వైఎస్ జగన్ మోహన్ రెడ్డి నేతృత్వంలో సోమవారం స‌మావేశం జరిగింది. క్యాంపు కార్యాలయంలో జరిగిన సమావేశంలో మంత్రులు పెద్దిరెడ్డి రామచంద్రారెడ్డి, బుగ్గన రాజేంద్రనాథ్ రెడ్డి, సీఎస్ సమీర్ శర్మ, స్పెషల్ సీఎస్ పూనం మాలకొండయ్య తదితరులు పాల్గొన్నారు. ఈ మేరకు దక్షిణాది రాష్ట్రాల కౌన్సిల్ సమావేశంలో చర్చించాల్సిన అంశాలను సీఎం జగన్ ఆదేశించారు.

రాష్ట్ర విభజన నేపథ్యంలో తలెత్తిన సమస్యలను సమావేశంలో ప్రస్తావించాలని, సమావేశంలో సమస్యల పరిష్కారంపై దృష్టి సారించాలని సీఎం జగన్‌ సూచించారు. పరిష్కారాలను సూచించే వ్యవస్థను ఏర్పాటు చేయాలని డిమాండ్ చేయాల్సిన అవసరం ఉందని సీఎం అన్నారు. వ్యవస్థ పరిష్కారాలను చూపడమే కాకుండా తీసుకున్న నిర్ణయాలను అమలు చేయాలని గట్టిగా డిమాండ్ చేయాల్సిన అవసరం ఉందని జగన్ అన్నారు.

ఈ సందర్భంగా సీఎం జగన్ మాట్లాడుతూ.. విభజన వల్ల రాష్ట్రం ఆర్థికంగా తీవ్రంగా నష్టపోయిందని, హైదరాబాద్ లాంటి నగరాన్ని కోల్పోయిందని, ఇప్పుడు విభజన, సమస్యల పరిష్కారంలో జాప్యం జరుగుతోందన్నారు. అందుకే ఈ సమస్యల పరిష్కారంపై దృష్టి సారించాలని, పోలవరం ప్రాజెక్టును పూర్తి చేసేందుకు తగినన్ని నిధులు విడుదల విష‌య‌మై చ‌ర్చించాల‌ని సూచించారు. దక్షిణాది రాష్ట్రాల కౌన్సిల్ సమావేశానికి ఆర్థిక మంత్రి బుగ్గన రాజేంద్రనాథ్ రెడ్డి నేతృత్వంలోని ప్రతినిధి బృందం హాజరవుతుంది.