ఏపీలో ఈ-కోర్టుల అమలుకు తీసుకున్న చర్యలేంటి.?

ఈ-కోర్టుల అమలుకు తీసుకున్న చర్యలేంటని పార్లమెంట్ వర్షాకాల సమావేశాల సందర్భంగా లోక్ సభలో ఏలూరు ఎంపీ పుట్టా మహేష్ కుమార్ అడిగిన ప్రశ్నకు కేంద్ర పార్లమెంటరీ వ్యవహారాలు, న్యాయశాఖ సహాయ మంత్రి అర్జున్‌రామ్‌ మేఘవాల్‌ లిఖిత పూర్వక సమాధానం ఇచ్చారు.

‎దేశంలోని న్యాయస్థానాలన్నింటిలో సాంకేతిక సౌకర్యాలు కల్పించి "ఈ-కోర్టులు"గా మార్చే ప్రక్రియలో భాగంగా సుప్రీంకోర్టు ఏర్పాటు చేసిన కమిటీతో సమన్వయం చేసుకుంటూ "ఈ-కోర్టులు" ప్రాజెక్టును అమలు చేస్తున్నట్లు కేంద్ర పార్లమెంటరీ వ్యవహారాలు, న్యాయశాఖ సహాయ మంత్రి అర్జున్‌రామ్‌ మేఘవాల్‌ తెలియజేశారు.

‎‎దేశవ్యాప్తంగా ఈ-కోర్టుల ద్వారా ఇప్పటివరకు రూ: 18.57 లక్షల కేసులు విచారణ జరిగాయని, NSTEP సాంకేతిక వ్యవస్థ ద్వారా సమన్ల జారీని సులభతరం చేసినట్లు కేంద్రమంత్రి తెలిపారు. ఆంధ్రప్రదేశ్ లో ఇప్పటికే 188 న్యాయస్థానాలకు 10 నుంచి 100 MBPS తో కూడిన WAN కనెక్టివిటీ ఇచ్చామని చెప్పారు. ఈ-కోర్టు ప్రాజెక్టులో భాగంగా ఆంధ్రప్రదేశ్ రాష్ట్రంలో ఫేజ్ 1, 2 లో హైకోర్టుతో పాటు 598 ఉప కోర్టులు ఈ ప్రాజెక్టు పరిధిలోకి తీసుకురాగా మరో 51 కోర్టులలో కూడా సాంకేతిక సౌకర్యాలు కల్పించే పని జరుగుతోందని తెలిపారు.

ఆంధ్రప్రదేశ్ రాష్ట్ర వ్యాప్తంగా మొత్తం 649 కోర్టులు ఈ ప్రాజెక్టు కింద ఎంపిక చేయగా ఉమ్మడి పశ్చిమగోదావరి జిల్లాలో 48 కోర్టులు ఈ ప్రాజెక్టు కింద అనుసంధానించబడ్డాయని కేంద్ర మంత్రి చెప్పారు. ఈ ప్రాజెక్టు కింద ఆంధ్రప్రదేశ్ రాష్ట్రంలో ఇప్పటివరకు 3,831 మంది న్యాయాధికారులు, సిబ్బందికి శిక్షణ ఇచ్చినట్లు, 8.4 కోట్ల కోర్టు రికార్డులు డిజిటల్ చేయబడినట్లు కేంద్ర మంత్రి అర్జున్‌రామ్‌ మేఘవాల్‌ వెల్లడించారు. ఈ-కోర్టు ప్రాజెక్టు కింద ఆంధ్రప్రదేశ్ రాష్ట్రంలో ఇప్పటివరకు రూ: 75 కోట్లకు పైగా ఖర్చు చేయగా, మరో రూ: 15.8 కోట్ల నిధులను విడుదల చేశామని మంత్రి తెలిపారు.