చంద్రబాబు రాజకీయ రాక్షసుడు: సీఎం జగన్

చంద్రబాబు రాజకీయ రాక్షసుడని, వంద సినిమా విలన్ల దుర్మార్గం కంటే చంద్రబాబు దుర్మార్గమే ఎక్కువని ఏపీ సీఎం వైఎస్ జగన్ మోహన్ రెడ్డి అన్నారు. పేదలందరికీ మంచి జరుగుతుంటే చంద్రబాబులో అసూయ మొదలైందని.. అమరావతిలో పేదలకు ఇల్లు ఇస్తుంటే కుల మతాల మధ్య సమతుల్యత దెబ్బతింటుందని కోర్టుకు వెళ్లాడని అన్నారు. ఎస్సి, ఎస్టీలుగా ఎవరైనా పుట్టాలని అనుకుంటారా అని దళితులను అవమానించాడని సీఎం జగన్ విమర్శించారు. ఇన్ని కుట్రలు చేసి కూడా చంద్రబాబు బరితెగించి రాజకీయాల్లో కొనసాగుతున్నాడని అన్నారు.

చంద్రబాబులాంటి వారితో రాజకీయాలు భ్రష్టు పట్టాయి. ఏం మంచి చేశాడో చెప్పుకునేందుకు చంద్రబాబుకు ఏమీ లేవన్నారు. చంద్రబాబు నాయుడును సపోర్ట్ చేసేవాళ్ళు రాష్ట్రంలో లేరని.. వాళ్లంతా రాష్ట్రం బయట ఉన్నవారేనని అన్నారు సీఎం జగన్. అన్ని వర్గాల ప్రజలను చంద్రబాబు మోసం చేశారని.. రుణమాఫీ పేరుతో పొదుపు సంఘాల మహిళలను చంద్రబాబు మోసం చేశారన్నారు. చంద్రబాబు 650 హామీలిచ్చి 10 శాతం కూడా అమలు చేయలేదని దుయ్యబట్టారు సీఎం జగన్. చంద్రబాబు నిసిగ్గుగా కొత్త మేనిఫెస్టోతో ప్రజల ముందుకు వస్తున్నారని విమర్శలు గుప్పించారు. సొంత సతీమణి కూడా చంద్రబాబు గెలుస్తాడని నమ్మటం లేదని అన్నారు. చంద్రబాబు దారుణాలు ఎల్లో మీడియాకు కనిపించవన్నారు. చంద్రబాబు పేరు చెబితే గుర్తుకు వచ్చే పథకం ఒక్కటైనా ఉందా? అని ప్రశ్నించారు. మనం సిద్ధం అంటుంటే చంద్రబాబు సతీమణి సిద్ధంగా లేమంటున్నారు. కుప్పం నుంచే బైబై బాబు అంటున్నారన్నారు సీఎం జగన్. మీ ఇంట్లో మంచి జరిగితే మీ బిడ్డకు తోడుగా ఉండండని కోరారు. దళారులు, బ్రోకర్లను నమ్ముకోలేదని.. దేవుడి ఆశీస్సులు, ప్రజలే నా నమ్మకమని తెలిపారు సీఎం జగన్.