ఏపీలోని ఆ ప్రాంత ప్రజలకు గుడ్‌న్యూస్..ఎల్లుండి 2,256 టిడ్కో ఇళ్ల పంపిణీ

విజయవాడలోని ఆర్థికంగా వెనుకబడిన మరియు మధ్యతరగతి కుటుంబాలకు గృహవసతి కల్పించే లక్ష్యంతో మార్చి 30న ముఖ్యమంత్రి చంద్రబాబు 2,256 టిడ్కో (TIDCO) ఇళ్లను లబ్ధిదారులకు పంపిణీ చేయనున్నారు. ఈ మేరకు విజయవాడ మున్సిపల్ కార్పొరేషన్ కమిషనర్ హెచ్.ఎం. ధ్యానచంద్ర శనివారం జక్కంపూడి, ఎన్టీఆర్ నగర్‌లోని గృహ నిర్మాణ ప్రాంగణాలను సందర్శించి ఏర్పాట్లను సమీక్షించారు.

ఉదయం 10 గంటలకు ప్రారంభమయ్యే ఈ పంపిణీ కార్యక్రమం లబ్ధిదారులకు ఎటువంటి ఇబ్బంది కలగకుండా అత్యంత పారదర్శకంగా, సజావుగా నిర్వహించాలని ఆయన అధికారులను ఆదేశించారు. ఈ కార్యక్రమంలో అదనపు కమిషనర్ డాక్టర్ డి. చంద్రశేఖర్, జోనల్ కమిషనర్లు, ఇతర ఉన్నతాధికారులు మరియు టిడ్కో సిబ్బంది పాల్గొని తమకు కేటాయించిన విధులను నిశితంగా పర్యవేక్షించనున్నారు. అర్హులైన ప్రతి కుటుంబానికి గృహ యాజమాన్యం కల్పించాలనే ప్రభుత్వ సంకల్పంలో భాగంగా ఈ బృహత్తర కార్యక్రమాన్ని చేపడుతున్నారు.