గ‌ర్వంగా ఉంది.. 'త‌మ్ముడు' విజ‌యంపై 'అన్న‌య్య' స్పంద‌న‌..!

ఆంధ్రప్రదేశ్‌లో భారీ విజయం దిశగా దూసుకెళ్తుంది టీడీపీ, జనసేన, బీజేపీ కూటమి. టీడీపీ 133, జనసేన 21 స్థానాలు, బీజేపీ 8 స్థానాల్లో ఆధిక్యంలో ఉన్నారు. అధికార పార్టీ వైసీపీకి ప్రజలు షాక్ ఇచ్చారు. ఆ పార్టీ ప్రస్తుతం కేవలం 13 సీట్లలో లీడింగ్‌లో కొనసాగుతోంది. ఈ క్రమంలో టీడీపీ, జనసేన, బీజేపీ కూటమి రాష్ట్రంలో ప్రభుత్వాన్ని ఏర్పాటు చేయడం కన్ఫామ్‌ అయిపోయింది.

ఈ క్ర‌మంలో కూట‌మి ఏర్పాటులో కీల‌కంగా మారిన ప‌వ‌న్ క‌ళ్యాణ్‌పై ప్ర‌శంస‌లు వెలువెత్తుతున్నాయి. ప‌వ‌న్ పార్టీ గెలుపుపై చిరంజీవి స్పందించారు. ఆయ‌న ఎక్స్‌లో.. డియర్ కళ్యాణ్ బాబు.. ఎక్కడ నెగ్గాలో, ఎక్కడ తగ్గాలో తెలిసిన నిన్ను, తగ్గావని ఎవరు అనుకున్నా.. అది ప్రజలని నెగ్గించటానికే అని నిరూపించిన నిన్ను చూస్తుంటే ఒక అన్నగా గర్వంగా వుంది. నువ్వు Game Changer వి మాత్రమే కాదు, Man of the match వి కూడా అని అందరూ నిన్ను కొనియాడుతుంటే నా హృదయం ఉప్పొంగుతోంది.. నీ కృషి, నీ త్యాగం, నీ ధ్యేయం, నీ సత్యం జనం కోసమే.. ఈ అద్భుతమైన ప్రజా తీర్పు, రాష్ట్ర భవిష్యత్తు కోసం, ప్రజల సంక్షేమం కోసం, అలాగే నీ కలల్ని, నువ్వేర్పరుచుకున్న లక్ష్యాల్ని నిజం చేసే దిశలో నిన్ను నడిపిస్తాయని ఆకాంక్షిస్తూ, ఆశీర్వదిస్తూ, శుభాభినందనలు. నీవు ప్రారంభించే ఈ కొత్త అధ్యాయంలో నీకు శుభం కలగాలని.. విజయం సాధించాలని మనస్ఫూర్తిగా ఆశిస్తున్నానని రాసుకొచ్చారు.