సీఎంపై అనుచిత వ్యాఖ్యలు.. టీడీపీ నేత అయ్యన్న పాత్రుడుపై కేసు నమోదు

మాజీ మంత్రి చింతకాయల అయ్యన్న పాత్రుడుపై కేసు నమోదైంది. ఈ నెల 18న పశ్చిమగోదావరి జిల్లా నల్లజర్లలో జరిగిన ఎన్టీఆర్ విగ్రహావిష్కరణ కార్యక్రమంలో రాజమండ్రి ఎంపీ భరత్, గోపాలపురం ఎమ్మెల్యే తలారి వెంకటరావు చేసిన వ్యాఖ్యలపై ఆగ్రహం వ్యక్తం చేసిన సంగతి తెలిసిందే. ముఖ్యమంత్రి వైఎస్‌ జగన్‌పై చేసిన అనుచిత వ్యాఖ్యలు ప్రజల్లో విద్వేషాలు రెచ్చగొట్టేలా ఉన్నాయని నల్లజర్ల వైఎస్‌ఆర్‌సీపీ గ్రామ కమిటీ అధ్యక్షుడు కండేపు రామకృష్ణ నల్లజర్ల పోలీసులకు ఫిర్యాదు చేశారు. మాజీ మంత్రి, టీడీపీ నేతపై పోలీసులు 506, 505, 153 (ఎ) సెక్షన్ల కింద కేసు నమోదు చేశారు.

శుక్రవారం పశ్చిమగోదావరి జిల్లా నల్లజర్లలో ఎన్టీఆర్ విగ్రహావిష్కరణ కార్యక్రమంలో అయ్యన్న పాత్రుడు పాల్గొన్నారు. గత మూడేళ్లలో అవినీతికి పాల్పడుతున్నారని ముఖ్యమంత్రి జగన్‌పై జరిగిన సభలో మాజీ మంత్రి విరుచుకుపడ్డారు. అధికార పార్టీ నేతల మాటలకు అనుగుణంగా డ్యాన్స్‌లు చేస్తున్నారంటూ పోలీసులపై కూడా అనుచిత వ్యాఖ్యలు చేశారు. అయితే వైఎస్సార్‌సీపీ నేత ఫిర్యాదు మేరకు మాజీ మంత్రిపై కేసు నమోదు చేశారు. కాగా, ఈ కేసులపై స్థానిక టీడీపీ నేతలు స్పందించారు. టీడీపీ నేతలపై తప్పుడు కేసులు పెడుతున్నారంటూ వైఎస్సార్‌సీపీ నేతలపై మాజీ జెడ్పీటీసీ చైర్మన్‌ ముళ్లపూడి బాపిరాజు, మాజీ ఎమ్మెల్యే ముప్పిడి వెంకటేశ్వరరావు మండిపడ్డారు.