ఆంధ్రప్రదేశ్ ప్రభుత్వం కీలక నిర్ణయం తీసుకుంది. మాస్టర్‌ ఆఫ్‌ కంప్యూటర్‌ అప్లికేషన్స్‌(MCA) కోర్సు వ్యవధిని రెండేళ్లకు తగ్గిస్తూ నిర్ణ‌యం తీసుకుంది. 2020-21 విద్యా సంవత్సరం నుంచి ఈ నిర్ణయం అమల్లోకి తీసుకుని రానున్నట్లు ఉత్తర్వులు జారీ చేసింది. ప్ర‌స్తుతం ఈ కోర్సు వ్య‌వ‌ధి మూడు సంవ‌త్స‌రాలుగా ఉంది.

ఈ నిర్ణయంతో 2020-21నుంచి MCA రెండేళ్ల కోర్సుగా మారనుంది. అందుకు సంబంధించిన క‌రికులంను రూపొందించాలంటూ వీసీల‌కు ఆదేశాలు జారీ చేసింది. మ్యాథ్స్ చదివిన బ్యాచిలర్ ఆఫ్ సైన్స్, కామర్స్, ఆర్ట్స్ గ్రాడ్యుయేట్స్‌కు ఎంసీఏ రెండేళ్లు మాత్రమే పరిగణించాలని ఆ ఆదేశాల్లో పేర్కొన్నారు. దీని వల్ల విద్యార్థులకు ఒక ఏడాది ఆదా అవుతుంది. మరోవైపు ఈ విధానాన్ని మహారాష్ట్రలో ఈ ఏడాది నుంచి అమల్లోకి తీసుకొచ్చారు.

గతంలో ఏఐసీటీఈ (AICTE )కూడా ఎంసీఏ కోర్సును రెండేళ్లకు తగ్గించిన సంగతి తెలిసిందే. 1990 ప్రాంతంలో ఈ కోర్సును ప్రవేశపెట్టగా.. దశాబ్దకాలం నుంచి ఈ కోర్సుకు ఆదరణ కరువైంది. ఇక నుంచి ఎంసీఏ మూడేళ్లు (6 సెమిస్టర్లు) బదులుగా రెండేళ్లు (4 సెమిస్టర్లు)లో పూర్తి చేస్తే పట్టా పొందవచ్చు.


సామ్రాట్

Next Story