Rain Alert : ఆ తేదీల్లో భారీ వర్షాలు.. హెచ్చరికలు జారీ

బంగాళాఖాతంలో ఏర్పడిన అల్పపీడనం ప్రభావంతో నవంబర్ 26 నుంచి 29 వరకు ఆంధ్రప్రదేశ్‌లోని పలు ప్రాంతాల్లో నాలుగు రోజులు భారీ వర్షాలు కురుస్తాయని భారత వాతావరణ శాఖ సోమవారం అంచనా వేసింది. దక్షిణ కోస్తా ఆంధ్ర ప్రదేశ్, రాయలసీమలోని కొన్ని ప్రాంతాలలో మంగళవారం నుండి శుక్రవారం వరకు భారీ వర్షాలు కురుస్తాయని వాతావరణ శాఖ హెచ్చరించింది. నవంబర్ 29 న ఉత్తర కోస్తా ఆంధ్ర ప్రదేశ్, యానాంలలో కూడా భారీ వర్షాలు కురుస్తాయని తెలిపారు.

వాయుగుండం రాగల 24 గంటల్లో వాయువ్య దిశగా పయనించి తీవ్ర అల్పపీడనంగా మారే అవకాశం ఉంది. ఆ తర్వాత రెండు రోజుల్లో తమిళనాడు-శ్రీలంక తీరం వైపు వాయువ్య దిశగా పయనించే అవకాశం ఉందని వాతావరణ శాఖ తెలిపింది. భారీ వర్షంతో పాటు, నవంబర్ 27 నుండి 29 వరకు రాష్ట్రవ్యాప్తంగా వివిధ ప్రదేశాలలో ఉరుములతో కూడిన వర్షం పడుతుందని హెచ్చరించారు వాతావరణ శాఖ అధికారులు.