తెలంగాణ.. ఈ ప్రాంతాలకు వర్ష సూచన

క్యుములోనింబస్ మేఘాల కారణంగా నేడు, రేపు తెలంగాణలోని పలు ప్రాంతాల్లో వర్షాలు కురుస్తాయని హైదరాబాద్ వాతావరణ కేంద్రం అంచనా వేసింది. హైద‌రాబాద్‌, రంగారెడ్డి జిల్లాల్లో తేలిక‌పాటి నుంచి మోస్త‌రు వ‌ర్షాలు ప‌డే అవ‌కాశం ఉండటంతో ఈ జిల్లాల‌కు హైద‌రాబాద్ వాతావ‌ర‌ణ కేంద్రం ఎల్లో అల‌ర్ట్ జారీ చేసింది.

జయశంకర్ భూపాలపల్లి, ములుగు, హనుమకొండ, వరంగల్, మహబూబాబాద్, భద్రాద్రి కొత్తగూడెం, ఖమ్మం, సూర్యాపేట, నల్గొండ జిల్లాల్లో ఉరుములు, మెరుపులు, ఈదురుగాలులతో కూడిన తేలికపాటి నుండి మోస్తరు వర్షాలు కురుస్తాయని అంచనా వేశారు. ఈ ప్రాంతాల్లో గంటకు 40 నుండి 50 కి.మీ వేగంతో ఈదురుగాలులు వీస్తాయని, ఇప్పటికే ఆరెంజ్ హెచ్చరికలు జారీ చేశారు.

సంగారెడ్డి, వికారాబాద్, హైదరాబాద్, రంగారెడ్డి, మహబూబ్ నగర్ జిల్లాల్లో కూడా తేలికపాటి నుండి మోస్తరు వర్షాలు కురిసే అవకాశం ఉంది. ఈ ప్రాంతాలకు ఎల్లో అలర్ట్ జారీ చేశారు. అదనంగా, ఏప్రిల్ 10 న గురువారం సిద్దిపేట, హనుమకొండ, వరంగల్, జనగాం, మహబూబాబాద్, హైదరాబాద్, యాదాద్రి భువనగిరి, రంగారెడ్డి, మహబూబ్ నగర్, నల్గొండ, సూర్యాపేట, ఖమ్మం, నాగర్ కర్నూల్ జిల్లాల్లో తేలికపాటి నుండి మోస్తరు వర్షాలు కురిసే అవకాశం ఉందని వాతావరణ కేంద్రం అంచనా వేసింది.