విశాఖ: పాఠశాలలో ఊడిన పెచ్చులు.. ముగ్గురు విద్యార్థులకు గాయాలు
Plaster of concrete ceiling falls on students in vizag. విశాఖపట్నంలోని పద్మనాభం పంచాయతీ పరిధిలోని అర్చకునిపాలెం ప్రాథమిక పాఠశాలలో
By అంజి Published on 8 Feb 2023 5:59 AM GMT
విశాఖపట్నంలోని పద్మనాభం పంచాయతీ పరిధిలోని అర్చకునిపాలెం ప్రాథమిక పాఠశాలలో ప్రమాదం జరిగింది. పాఠశాలలోని క్లాస్‌రూమ్‌లో అకస్మాత్తుగా పెచ్చులు ఉడిపడ్డాయి. దీంతో తరగతిలో ముగ్గురు విద్యార్థులు గాయపడ్డారు. విద్యార్థులకు క్లాస్‌ తీసుకోవడంలో బిజీగా ఉన్న సమయంలో ఈ ఘటన జరిగింది. ఫస్ట్‌ క్లాస్‌ విద్యార్థి తాలాడ వేదశ్రీ తలకు స్వల్ప గాయాలయ్యాయి. ఆమెను విజయనగరం ప్రభుత్వాసుపత్రికి తరలించారు. ఆమె పరిస్థితి నిలకడగా ఉన్నట్లు సమాచారం. మరో ఇద్దరు విద్యార్థులకు స్వల్ప గాయాలయ్యాయి.
ప్రమాదం జరిగిన పాఠశాల భవనాన్ని నాడు - నేడులో భాగంగా ఇటీవలే పునరుద్ధరించారు. నాణ్యత లేని మెటీరియల్‌ను అధికారులు వాడుతున్నారని తల్లిదండ్రులు ఆరోపిస్తున్నారు. ఈ తరగతి గదిలో 1 నుంచి 3వ తరగతి విద్యార్థులకు పాఠాలు బోధిస్తున్నారు. మరమ్మతులు చేపట్టిన నెల వ్యవధిలోనే పెచ్చులుడటంపై అధికారుల నిర్లక్ష్యం స్పష్టంగా కనిపిస్తోందని విద్యార్థుల తల్లిదండ్రులు అంటున్నారు. కాంట్రాక్టర్ల కాసుల కక్కుర్తి వల్లే ఈ ప్రమాదం జరిగిందని, ఇప్పటికైనా అధికారులు స్పందించి తగిన చర్యలు చేపట్టాలని విద్యార్థులు తల్లిదండ్రులు అంటున్నారు.
