సన్నీలియోన్‌ పేరిట అకౌంట్‌.. నెలకు రూ.1000

ఆర్థికంగా వెనుకబడిన వివాహిత మహిళల కోసం ఛత్తీస్‌గఢ్‌ ప్రభుత్వం 'మహతారి వందన్‌ యోజన' పథకం అమలు చేస్తోంది. పథకం కింద ప్రతి నెలా ఆర్థిక వెనుకబడిన మహిళల ఖాతాల్లో రూ.వెయ్యి జమ చేస్తోంది. తాజాగా ఈ ప్రభుత్వ పథకం కింద ఛత్తీస్‌గఢ్ అధికారులు ఎవరూ ఊహించని లబ్ధిదారురాలిని గుర్తించారు.

నటి సన్నీలియోన్‌ పేరిట అకౌంట్‌ క్రియేట్‌ చేసిన ప్రబుద్ధుడు నెల నెలా రూ.1000 పొందుతున్నాడు. లబ్ధిదారురాలు సన్నిలియోన్‌ అని, ఆమె భర్త పేరు జానీ సిన్స్, అడల్ట్ ఫిల్మ్ స్టార్ అని రికార్డ్ చేయబడింది. బస్తర్‌కు చెందిన ఓ వ్యక్తి మహిళలకు నెలకు రూ.1,000 అందించే పథకం కింద ప్రయోజనాలను మోసపూరితంగా క్లెయిమ్ చేసేందుకు నటి పేరుతో నకిలీ పత్రాలను రూపొందించినట్లు విచారణలో తేలింది. నటి సన్నీలియోన్‌ పేరిట అకౌంట్‌ క్రియేట్‌ చేసిన ప్రబుద్ధుడు వీరేందర్‌ జోషి నెలనెలా రూ.1000 పొందుతున్నాడు.

ఈ క్రమంలోనే అధికారులు క్రమరాహిత్యాన్ని గమనించిన తర్వాత, బస్తర్ కలెక్టర్ హరీస్ ఎస్ ఈ విషయంపై విచారణకు మహిళా, శిశు అభివృద్ధి శాఖను ఆదేశించారు. సంబంధిత బ్యాంకు ఖాతాలను స్తంభింపజేయాలని, దుర్వినియోగమైన నిధులను రికవరీ చేయాలని, సంబంధిత వ్యక్తులపై ఎఫ్‌ఐఆర్‌ నమోదు చేయాలని ఆదేశించారు. తదనంతరం దర్యాప్తు ప్రారంభించబడింది. నేరస్థుడు వీరేంద్ర జోషిగా గుర్తించబడ్డాడు, మహతరీ వందన్ స్కీమ్‌లో నమోదు చేసుకోవడానికి అంగన్‌వాడీ వర్కర్ వేదమతి జోషికి చెందిన మోసపూరిత పత్రాలను ఉపయోగించినట్లు తేలింది.

ఫేక్‌ అకౌంట్‌లో ఉన్న నిధులను తన ఖాతాలోకి మార్చుకున్నాడు. ఆ వ్యక్తి మార్చి 2024 నుండి ప్రతి నెలా డబ్బు అందుకుంటున్నట్లు రికార్డులు చూపించాయి. ప్రభుత్వాన్ని మోసం చేసినందుకు వీరేంద్ర జోషిపై ఎఫ్‌ఐఆర్ నమోదు చేస్తున్నట్లు అధికారులు తెలిపారు. అతని బ్యాంక్ ఖాతా స్తంభింపజేయబడింది. రికవరీ ప్రక్రియలు ప్రారంభమయ్యాయి. వేదమతి జోషి, లోపానికి కారణమైన సూపర్‌వైజర్‌పై కూడా క్రమశిక్షణా చర్యకు సిఫార్సు చేయబడింది.