ఐబొమ్మ.. బప్పం.. పేర్ల వెన‌క‌ అసలు కథ ఇదే..!

ఐబొమ్మ రవి మూడు రోజుల విచారణ నేటితో ముగిసింది. పోలీసులు రెండవసారి ఐబొమ్మ రవిని కస్టడీలోకి తీసుకుని విచారించారు. మొదటిసారి ఐదు రోజులు.. రెండవసారి మూడు రోజులు.. మొత్తం ఎనిమిది రోజులపాటు ఐబొమ్మ ర‌విని విచారించారు. మొదటిసారి విచారణ సందర్భంగా సాంకేతిక ఆధారాల సేకరణ జాప్యం కావడంతో మరింత విచారణ కోసం కస్టడీకి ఇవ్వాలని సీసీఎస్ పోలీసులు కోర్టును అభ్యర్థించారు. ఈ క్ర‌మంలోనే కోర్టు అనుమతితో ఐబొమ్మ ర‌విని మూడు రోజులపాటు విచారించారు. నేటితో విచార‌ణ స‌మ‌యం ముగియ‌డంతో.. తిరిగి కోర్టులో హాజరుపరిచేందుకు నాంపల్లి కోర్టుకు తరలించారు.

ఇదిలావుంటే.. ఐబొమ్మ పేరుపై ప‌లు ఊహాగానాలు ప్ర‌చారంలో ఉన్నాయి.. రవి ఇంటి పేరు ఇమ్మడి కాగా.. అందువల్ల iBOMMA అని పెట్టాడని అంతా అనుకున్నారు. కానీ.. ఈ ప్రచారంలో నిజం లేదని తేలిపోయింది. iBOMMA అంటే ఇమ్మడి బొమ్మ కాదు.. ఇంటర్నెట్ బొమ్మ అనే అర్థంలో పేరు పెట్టినట్లు విచారణలో చెప్పిన‌ట్లు తెలుస్తుంది. రవి సొంతూరు విశాఖపట్నం. విశాఖ ప్రాంతంలో సినిమాను బొమ్మ అని అంటుంటారు. ఇంటర్నెట్లో చూపించే బొమ్మ అనే ఆలోచనతో ఐబొమ్మ అని రవి తన పైరసీ వెబ్ సైట్ కు పేరు పెట్టాడట. రెండో వెబ్సైట్కు బలపం అని పేరు పెట్టాలని అనుకున్నాడు. డొమైన్లో టెక్నికల్ సమస్య వల్ల L అక్షరం తీసుకోలేదు. దీంతో దాని బదులు ఇంకో పీ అక్షరం పెట్టి బప్పం అని రిజిస్టర్ చేశాడు. ఇలా iBOMMA, BAPPAM TV పేర్లు పెట్టిన‌ట్లు విచార‌ణ‌లో తేలింది.

సినీ పరిశ్రమకు చెందినవారితో కూడా రవికి సంబంధాలు ఉన్నట్లుగా పోలీసుల విచారణలో స్పష్టమైనట్లు తెలిసింది. మొదటిసారి విచారణ అనంతరం అధికారులు మీడియాకు వివరాలు వెల్లడించారు. రెండవసారి విచారణ అనంతరం కూడా వివరాలు వెల్లడించే అవకాశం ఉంది. దేశవ్యాప్తంగా సంచలనం సృష్టించిన రవి అరెస్ట్ కేసుకు సంబంధించి రకరకాల వార్తలు సోషల్ మీడియాలో పోస్ట్ అవుతున్న నేపథ్యంలో విచారణకు సంబంధించి స్పష్టత ఇచ్చే ప్రయత్నంలో పోలీస్ అధికారులు ఉన్న‌ట్లు తెలుస్తుంది.