SIR విషయంలో తెలంగాణ త్వరలోనే మార్గదర్శకంగా నిలుస్తుంది: గ్యానేశ్ కుమార్

హైదరాబాద్: ప్రత్యేక సమగ్ర ఓటర్ల జాబితా సవరణ (స్పెషల్ ఇంటెన్సివ్ రివిజన్ – ఎస్ఐఆర్) విషయంలో తెలంగాణ త్వరలోనే దేశమంతటికి మార్గదర్శకంగా నిలుస్తుందని..భారత ప్రధాన ఎన్నికల కమిషనర్ గ్యానేశ్ కుమార్ అన్నారు. ఈ విషయంలో ఇటీవల బీహార్‌లో విజయవంతంగా పూర్తయిన ఎస్ఐఆర్ ప్రక్రియను ప్రమాణంగా తీసుకోవాలని ఆయన పేర్కొన్నారు. బూత్ స్థాయి అధికారులను (బీఎల్‌ఓలు) ఉద్దేశించి మాట్లాడుతూ, భారత ఎన్నికల వ్యవస్థకు బీఎల్‌ఓలే వెన్నెముక అని, వారి నిబద్ధత, కృషిపైనే ఓటర్ల జాబితా శుద్ధి విజయం ఆధారపడి ఉంటుందని తెలిపారు. ప్రపంచం మొత్తం భారతదేశం ఎన్నికలను ఎలా నిర్వహిస్తుందో తెలుసుకోవాలనే ఆసక్తితో గమనిస్తోందని ఆయన వ్యాఖ్యానించారు.

బీహార్‌ను ఉదాహరణగా ప్రస్తావిస్తూ, అక్కడ నిర్వహించిన భారీ ఎస్ఐఆర్ ప్రక్రియ ఎలాంటి లోపాలు లేకుండా పూర్తయిందని సీఈసీ తెలిపారు. ఇటీవల జరిగిన అసెంబ్లీ ఎన్నికల్లో సుమారు 7.5 కోట్ల మంది ఓటర్లు తమ ఓటు హక్కును వినియోగించుకున్నారని, ఈ మొత్తం ప్రక్రియలో ఒక్క ఫిర్యాదు కూడా నమోదు కాకపోవడం, రీపోలింగ్‌, రీకౌంటింగ్‌ అవసరం లేకపోవడం విశేషమని చెప్పారు. ఈ విజయానికి కారణమైన బీహార్ బీఎల్‌ఓలను ఆయన అభినందించారు.

తెలంగాణ విస్తీర్ణం కెనడాకంటే పెద్దదని పేర్కొన్న గ్యానేశ్ కుమార్, సమగ్ర ఓటర్ల జాబితా శుద్ధి పూర్తయిన తర్వాత రాష్ట్రంలో ఎన్నికల పరిపాలన ఒక కొత్త యుగంలోకి అడుగుపెడుతుందని అన్నారు. బీఎల్‌ఓలతో జరిగిన పరస్పర చర్చలో పట్టణ ప్రాంతాల్లో పోలింగ్ శాతం తక్కువగా ఉండటానికి పట్టణ ఓటర్ల నిరాసక్తతే ప్రధాన కారణమని ఆయన తెలిపారు. గ్రామీణ ప్రాంతాల ఓటర్లు మాత్రం ఉత్సాహంగా క్యూల్లో నిలబడి ఓటు హక్కును వినియోగిస్తూ దేశానికి దారి చూపుతున్నారని వ్యాఖ్యానించారు. భారతదేశంలో ఎన్నికలు పూర్తిగా దేశ చట్టాల ప్రకారమే నిర్వహించబడుతున్నాయని, ఎన్నికల చట్టాలను ప్రతి ఒక్కరూ తప్పనిసరిగా పాటించాల్సిందేనని సీఈసీ స్పష్టం చేశారు.