తెలంగాణ టెట్‌ ఫలితాలు విడుదల.. రిజల్ట్స్‌ కోసం ఇక్కడ చూడండి

తెలంగాణ టెట్‌ ఫలితాలు విడుదలయ్యాయి. సీఎం రేవంత్‌ రెడ్డి అధికారులతో కలిసి రిజల్ట్స్‌ రిలీజ్‌ చేశారు. మే 20 నుంచి జూన్‌ 2 వరకు జరిగిన ఈ పరీక్షలకు 2,36,487 మంది హాజరయ్యారు. డీఎస్సీ నియామకాల్లో టెట్‌ మార్కులకు 20 శాతం వెయిటేజీ ఉంటుంది. ఫలితాల కోసం https://schooledu.telangana.gov.in website ని సందర్శించండి.

పరీక్షకు 2,86,381 మంది అభ్యర్థులు దరఖాస్తు చేసుకున్నారు. పేపర్-1 పరీక్షకు మొత్తం 85,996 మంది అభ్యర్థులు హాజరుకాగా, 57,725 మంది అర్హత సాధించారు. కాగా, పేపర్-2 పరీక్షకు 1,50,491 మంది అభ్యర్థులు హాజరుకాగా.. 51,443 మంది అర్హత సాధించారు. శాతాల పరంగా 67.13% మంది పేపర్-1లో అర్హత సాధించారు. 2023తో పోలిస్తే 30.24% పెరుగుదల. పేపర్-2కి 34.18% మంది అర్హత సాధించారు. 2023 కంటే 18.88% పెరుగుదల.

గతంలో దరఖాస్తుల స్వీకరణ సమయంలో ఎన్నికల కోడ్ అమలులో ఉన్నందున టెట్ దరఖాస్తు రుసుమును తగ్గిస్తూ ప్రభుత్వం తీసుకున్న నిర్ణయాన్ని ఎన్నికల సంఘం ఆమోదించలేదు. దీంతో స్పందించిన రాష్ట్ర ప్రభుత్వం దరఖాస్తుదారులకు ఉపశమనం కల్పించాలని నిర్ణయించింది. టెట్‌-2024లో అర్హత సాధించని దరఖాస్తుదారులు రుసుము చెల్లించకుండా తదుపరి టెట్‌ పరీక్షకు దరఖాస్తు చేసుకోవచ్చు.

అదనంగా, టెట్‌-2024లో అర్హత సాధించిన అభ్యర్థులు ఒకసారి డీఎస్సీ పరీక్షకు దరఖాస్తు చేసుకోవడానికి ప్రభుత్వం ఫీజు మినహాయింపును ప్రకటించింది.