3 వారాల్లో రూ.54 కోట్లు చెల్లించాల్సిందే..గీతం వర్సిటీకి హైకోర్టు ఆదేశం

సంగారెడ్డి సర్కిల్ పరిధిలోని రుద్రారం సెక్షన్ పరిధిలోని గీతం యూనివర్సిటీ దక్షిణ తెలంగాణ విద్యుత్ పంపిణి సంస్థకు 118 కోట్ల రూపాయల విద్యుత్ బకాయి పడిన విషయం తెలిసిందే. సంస్థ పరిధిలో వివిధ సర్కిళ్ల నుండి డిస్కంకు దాదాపు 2400 కోట్ల రూపాయలు కోర్టు కేసులతో లింక్ అయివున్నాయి. ఈ మొండి బకాయిల వసూళ్ళలో భాగంగా గతేడాది జులై లో సీఎండీ ముషారఫ్ ఫారూఖీ ఐఏఎస్ ఆదేశాలతో స్పెషల్ డ్రైవ్ చేపట్టారు.

దానిలో భాగంగా బకాయిదారులందరికి డిస్కనెక్షన్ నోటీసులు జారీ చేసారు. కొంత మంది వినియోగదారుల నుండి దాదాపు 500 కోట్ల రూపాయిల మేర వసూలయ్యాయి. అయితే గీతం యూనివర్సిటీ మాత్రం బకాయి చెల్లించకుండా హైకోర్ట్ ను ఆశ్రయించింది. కేసును విచారించిన ఇద్దరు న్యాయ మూర్తులతో కూడిన హై కోర్ట్ బెంచ్ మూడు వారాల్లోగా 54 కోట్ల రూపాయలు డిపాజిట్ చేయాల్సిందేనని వర్శిటీ యాజమాన్యాన్ని ఆదేశించింది.