ఆస్తిలో హక్కే కాదు.. తల్లిదండ్రుల సంరక్షణలోనూ కుమార్తెలకు సమాన బాధ్యత : హైకోర్టు

వృద్ధాప్యంలో ఉన్న తల్లిదండ్రులను చూసుకోవడంలో కుమార్తెలు, కుమారులు ఇద్దరూ సమానంగా బాధ్యత వహించాలని తెలంగాణ హైకోర్టు పేర్కొంది. ముఖ్యంగా ఆస్తిపై హక్కులు కోరే విషయంలో కుమార్తెలు కూడా తల్లిదండ్రుల జీవితంలో కీలకంగా వ్యవహరిస్తారని తెలంగాణ హైకోర్టు స్పష్టం చేసింది. తల్లిదండ్రుల ఆస్తులపై హక్కులు కోరుతున్నప్పుడు, వృద్ధాప్యంలో ఉన్న వారిని చూసుకునే బాధ్యతలో కుమారులతో పాటు కుమార్తెలకు కూడా సమాన బాధ్యత ఉంటుందని తెలంగాణ హైకోర్టు బుధవారం స్పష్టం చేసింది. సూర్యాపేట జిల్లాకు చెందిన 66 ఏళ్ల వృద్ధురాలు దాఖలు చేసిన పిటిషన్‌పై విచారణ చేపట్టిన జస్టిస్ బి. విజయసేన్ రెడ్డి ఈ వ్యాఖ్యలు చేశారు. తన కుమారుడు తనను నిర్లక్ష్యం చేశాడని, కాబట్టి తన ఆస్తిని తనకు తిరిగి ఇప్పించాలని ఆ వృద్ధురాలు కోర్టును ఆశ్రయించింది.

ప్రస్తుతం తన కుమార్తె వద్ద ఉంటున్న ఆ వృద్ధురాలు.. 2025 డిసెంబర్‌లో Maintenance and Welfare of Parents and Senior Citizens Act కింద జారీ చేసిన ఆదేశాలను అమలు చేయడంలో అధికారులు విఫలమయ్యారని కోర్టుకు తెలిపింది. పోలీస్, పరిపాలనాపరమైన మద్దతు కోసం రెవెన్యూ డివిజనల్ ఆఫీసర్ (RDO) ఆదేశాలు జారీ చేసినప్పటికీ, తన విజ్ఞప్తులు ఏవీ పట్టించుకోలేదని ఆమె పేర్కొంది. పిటిషనర్ వాదనలు విన్న హైకోర్టు ఈ విషయంపై వివరణ ఇవ్వాలని సూర్యాపేట అధికారులను ఆదేశిస్తూ, తదుపరి విచారణను ఏప్రిల్ 15కు వాయిదా వేసింది.

విచారణ సందర్భంగా, పిల్లలు వృద్ధాప్యంలో ఉన్న తల్లిదండ్రులను నిర్లక్ష్యం చేయడం పట్ల న్యాయమూర్తి ఆందోళన వ్యక్తం చేశారు. పిల్లలు తల్లిదండ్రుల ఆస్తిపై హక్కులు అడిగినప్పుడు, వారి బాధ్యతను కూడా తీసుకోవాలని స్పష్టం చేశారు. తల్లిదండ్రుల బాధ్యత తీసుకోవడాన్ని పిల్లల లింగభేదం ఆధారంగా నిర్ణయించలేమని న్యాయమూర్తి తెలిపారు. ఒకవేళ కూతురు ఒక్కతే సంతానమైతే, తల్లిదండ్రులను చూసుకునే బాధ్యత సహజంగానే ఆమెపై ఉంటుందని ధర్మాసనం పేర్కొంది.