ఖమ్మం జిల్లాలో రూ.230 కోట్లతో ఆయిల్‌పామ్‌ ఫ్యాక్టరీ

ఖమ్మం జిల్లా వేంసూరు మండలం కల్లూరుగూడెంలో 41 ఎకరాల విస్తీర్ణంలో ఆయిల్‌పామ్‌ ఫ్యాక్టరీని ఏర్పాటు చేసేందుకు రాష్ట్ర ప్రభుత్వం రూ.230 కోట్లు వెచ్చించనుందని వ్యవసాయ శాఖ మంత్రి ఎస్‌ నిరంజన్‌రెడ్డి తెలిపారు. సోమవారం గ్రామంలో ఫ్యాక్టరీ కోసం గుర్తించిన స్థలాన్ని ఎంపీ బండి పార్థసారధిరెడ్డి, ఎమ్మెల్యే సండ్ర వెంకట వీరయ్యతో కలిసి మంత్రి పరిశీలించారు. కొత్తగూడెం జిల్లా అశ్వారావుపేటలో ఆయిల్‌పామ్‌ ఫ్యాక్టరీ ఉన్నప్పటికీ భవిష్యత్తు అవసరాలను దృష్టిలో ఉంచుకుని కొత్త ఫ్యాక్టరీని ఏర్పాటు చేస్తున్నామన్నారు.

టీఎస్ కో-ఆప్ ఆయిల్ సీడ్స్ గ్రోవర్స్ ఫెడరేషన్ ద్వారా అనుభవం ఉన్న కంపెనీకి లేఅవుట్, ఫ్యాక్టరీ నిర్మాణ పనులను అప్పగించినట్లు తెలిపారు. రాష్ట్రంలో ఫుడ్ జోన్ల ఏర్పాటుకు ముఖ్యమంత్రి కే చంద్రశేఖర్ రావు కృషి చేస్తున్నారన్నారు. రాష్ట్రంలో ఆహార పరిశ్రమల స్థాపనకు సుమారు 1500 ఎకరాల భూమిని కేటాయించారన్నారు. కొత్త ఆయిల్‌పామ్‌ కర్మాగారం పంటల వైవిధ్యాన్ని ప్రోత్సహించడానికి, వ్యవసాయాన్ని లాభసాటిగా మార్చడానికి దోహదపడుతుందని నిరంజన్‌రెడ్డి అన్నారు.