తెలంగాణ రైతులకు గుడ్‌న్యూస్.. ఆగస్టు 15 నాటికి రూ.2 లక్షల రుణమాఫీ

హైదరాబాద్: అసెంబ్లీ ఎన్నికలకు ముందు ఇచ్చిన హామీలను అమలు చేయలేదంటూ విపక్షాల దాడులు పెరుగుతున్న నేపథ్యంలో ఆగస్టు 15లోగా రూ.2 లక్షల వరకు ఉన్న వ్యవసాయ రుణాలను మాఫీ చేస్తామని తెలంగాణ ముఖ్యమంత్రి ఎ. రేవంత్ రెడ్డి సోమవారం ప్రకటించారు. లోక్‌సభ ఎన్నికల ప్రచారంలో భాగంగా సోమవారం సాయంత్రం నారాయణపేటలో జరిగిన కాంగ్రెస్ 'జన జాతర సభ'లో రేవంత్‌రెడ్డి మాట్లాడుతూ రైతుల రుణాలను ఒకే దఫాలో మాఫీ చేస్తామని హామీ ఇచ్చారు. రైతుల రుణాలను మాఫీ చేస్తామన్న కాంగ్రెస్‌ ప్రభుత్వం మాటపై వెనక్కి తగ్గదని, లోక్‌సభ ఎన్నికల ప్రవర్తనా నియమావళి కారణంగా ఇప్పటి వరకు రుణాలు మాఫీ కాలేదన్నారు.

వచ్చే పంట సీజన్‌ నుంచి క్వింటాల్‌ వరికి రూ.500 బోనస్‌గా ప్రభుత్వం చెల్లిస్తుందని రేవంత్‌రెడ్డి రైతులకు హామీ ఇచ్చారు. లోక్‌సభ ఎన్నికలు పూర్తయిన రెండు నెలల్లో స్థానిక సంస్థల ఎన్నికలు నిర్వహిస్తామని తెలంగాణ కాంగ్రెస్ చీఫ్ ప్రకటించారు. ఈ సందర్భంగా.. ప్రభుత్వ పథకాలను 'ఇందిరమ్మ' కమిటీల ద్వారానే అమలు చేస్తామని, ఆ పథకాలకు లబ్ధిదారులను ఎంపిక చేసే అధికారం వారికి ఉంటుందని ముఖ్యమంత్రి ప్రకటించారు.

రాష్ట్రంలోని 17 లోక్‌సభ స్థానాల్లో ఐదు స్థానాల్లో విజయం సాధించేందుకు భారతీయ జనతా పార్టీ (బిజెపి)తో భారత రాష్ట్ర సమితి (బిఆర్‌ఎస్) రహస్య ఒప్పందం కుదుర్చుకుందని ఆయన ఆరోపించారు. దేశ రాజధాని ఢిల్లీలో ఎక్సైజ్ పాలసీ కేసులో ప్రస్తుతం జైలులో ఉన్న తన కుమార్తె (కె. కవిత)కి బెయిల్ ఇప్పించేందుకు బీఆర్‌ఎస్ అధ్యక్షుడు కె. చంద్రశేఖర్ రావు తన పార్టీని ప్రధాని నరేంద్ర మోదీకి తాకట్టు పెట్టారని ముఖ్యమంత్రి ఆరోపించారు.

రాష్ట్రంలో 15 లోక్‌సభ స్థానాలు కాంగ్రెస్‌ గెలిస్తే రాష్ట్ర మంత్రివర్గంలో ముదిరాజ్‌ సామాజికవర్గానికి ప్రాతినిధ్యం కల్పిస్తామన్నారు ముఖ్యమంత్రి. కేసీఆర్‌ రాష్ట్ర జనాభాలో శాతం 10 మంది ఉన్న ముదిరాజ్‌ వర్గానికి ఒక్క టికెట్‌ కూడా ఇవ్వలేదని మండిపడ్డారు. ప్రస్తుతం ఉన్న బీసీ-డీ కేటగిరీ కాకుండా ముదిరాజ్‌లను బీసీ-ఏ కేటగిరీ చేయాలని సుప్రీంకోర్టులో కేసు నడుస్తోందని, అయితే బీఆర్‌ఎస్ ప్రభుత్వం పదేళ్లుగా చేసిందేమీలేదన్నారు.