స్థానిక ఎన్నికలను వాయిదావేసి.. 42 శాతం బీసీ రిజర్వేషన్‌లను అమలు చేయాల్సిందే

హైకోర్టుకు సమర్పించిన డెడికేటెడ్‌ కమిషన్‌ నివేదికలలో ప్రామాణిక పద్ధతులు పాటించలేదని హైకోర్టు అసంతృప్తిని వ్యక్తం చేసినప్పటికీ, రిజర్వేషన్‌ల కేటాయింపులో అన్యాయం జరిగిందని సాక్షాత్తు రాష్ట్ర బిసి కమిషన్‌ తప్పు పట్టినప్పటికీ ప్రభుత్వం స్థానిక సంస్థల ఎన్నికలకు ముందుకు వెళ్లడం నియంతృత్వ పోకడ, ఫ్యూడల్‌ భావజాలానికి నిదర్శనమని రాజ్యసభ సభ్యుడు, జాతీయ బీసీ సంక్షేమ సంఘం అధ్యకక్షుడు ఆర్‌.కృష్ణయ్య అన్నారు.

ఒకవైపు హైకోర్టు అసంతృప్తి చెందడం, మరో వైపు రిజర్వేషన్‌ల ప్రక్రియతో ఆ వర్గాలకు అన్యాయం జరుగుతుందని బిసి కమిషన్‌ స్పష్టంగా తెలియజేసినప్పటికీ ప్రభుత్వంలో చలనం లేకపోవడం సిగ్గుచేటని అన్నారు. దిద్దుబాటు చర్యలు వెంటనే చేపట్టాలని డిమాండ్‌ చేశారు. అలా కాకుండా మొండి వైఖరితో ఎన్నికలు నిర్వహించాలని చూస్తే తగిన గుణపాఠం చెబుతామని ఆయన హెచ్చరించారు.

శనివారం నాడు బీసీ జేఏసీ ఆధ్వర్యంలో హైదరాబాద్‌లోని బషీర్‌బాగ్‌ చౌరస్తా నుండి బాబూ జగ్జీవన్‌రామ్‌ విగ్రహం వరకు బిసి తిరుగుబాటు ప్రదర్శన జరిగింది. ఈ ప్రదర్శనలో వేలాదిగా తరలివచ్చిన కార్యకర్తలు, బీసీ సంఘాల ప్రతినిధులు, మేధావులు, నాయకులు పెద్ద ఎత్తున పాల్గొన్నారు. ప్రభుత్వ వైఖరిపై నిరసన వ్యక్తం చేశారు. రాష్ట్ర ప్రభుత్వానికి నిజంగా చిత్తశుద్ధి ఉంటే వెంటనే ఎన్నికలను వాయిదావేసి 42% రిజర్వేషన్‌ల ఖరారు దిశగా చర్యలు చేపట్టాలని డిమాండ్‌ చేశారు.

ఈ సందర్భంగా బీసీల తిరుగుబాటు ప్రదర్శన అనంతరం జరిగిన సభలో ఆర్‌.కృష్ణయ్య ప్రసంగిస్తూ.. ప్రభుత్వం వెంటనే ఎన్నికలను వాయిదావేసి, 42% బీసీ రిజర్వేషన్‌ల అమలుకు చర్యలు చేపట్టాలని డిమాండ్‌ చేశారు. రేవంత్‌ ప్రభుత్వం బీసీల ఆత్మగౌరవానికి, మనోభావాలకు భంగం కలిగిస్తూ, ప్రజా వ్యతిరేక చర్యలకు పాల్పడుతుందని ఆయన మండిపడ్డారు. ఇచ్చిన మాటను నిలబెట్టుకోలేని ప్రభుత్వం, ప్రజాప్రభుత్వం ఎలా అవుతుందని ఆయన ప్రశ్నించారు. ఇది బిసిలకు మోసం, దగా, నయవంచన చేయడమేనని ఆయన విమర్శించారు. ప్రజల ఆత్మగౌరవానికి భంగం కలిగినప్పుడు శ్రీలంక, బంగ్లాదేశ్‌, నేపాల్‌ మున్నగు అనేక దేశాలలో ఏం జరిగిందో రేవంత్‌ ప్రభుత్వం గమనంలో ఉంచుకోవాలని కృష్ణయ్య హితవు పలికారు.