కేంద్రం సంక్షేమ పథకాలను అటకెక్కించే ప్ర‌య‌త్నం చేస్తోంది

ఉచితాలకు వ్యతిరేకంగా ప్రధాని నరేంద్ర మోదీ మాట్లాడడాన్ని రవాణా శాఖ మంత్రి పువ్వాడ అజయ్ కుమార్ తీవ్రంగా తప్పుబట్టారు. తెలంగాణ ప్రభుత్వం ప్రజా సంక్షేమం కోసం ఉద్దేశించిన పథకాలను అమలు చేయకుండా కేంద్రం ఆపడానికి ప్రయత్నిస్తోందని ఆరోపించారు.

భారతీయ బ్యాంకులకు వేల కోట్ల రూపాయలను ఎగ్గొట్టిన ప్రైవేట్ కార్పొరేట్ పెద్దలను పట్టుకోవడంలో విఫలమైన మోదీ ప్రభుత్వం.. ప్రభుత్వ సంక్షేమ పథకాలతో లబ్ధి పొందుతున్న రైతులు, బడుగు బలహీన వర్గాలపై విషం చిమ్ముతోందని విమ‌ర్శించారు.

మంగళవారం లబ్ధిదారులకు కొత్తగా మంజూరైన ఆసరా పింఛన్ల గుర్తింపు కార్డులను అజయ్‌కుమార్‌ పంపిణీ చేశారు. ఈ సందర్భంగా ఏర్పాటు చేసిన సమావేశంలో ఆయన మాట్లాడుతూ.. రాష్ట్ర ప్రభుత్వం అమలు చేస్తున్న సంక్షేమ పథకాల్లో కేంద్రానికి ఎలాంటి వాటా లేదని.. అందువల్ల వాటిని ఉచితాలుగా చెప్పుకునే హక్కు కేంద్రానికి లేదని స్పష్టం చేశారు.

ఆసరా పెన్షన్లు, రైతు బంధు, నీటిపారుదల అవసరాలకు ఉచిత విద్యుత్ వంటి సంక్షేమ పథకాలు అన్ని సంబంధిత వర్గాల సమ్మిళిత ఆర్థిక వృద్ధికి ప్రాథమికమైనవి. మోదీ ప్రభుత్వం రాజకీయ పరపతి కోసం అనేక పథకాల రూపంలో ఉచితాలను కూడా అందజేస్తోందని అన్నారు.

రాజకీయ మైలేజీ కోసం సమాజాన్ని విభజించేందుకు బీజేపీ నాయకత్వం మత విద్వేషాలను రెచ్చగొడుతుందని ఆరోపించారు. బీజేపీ నేతలు చేస్తున్నది దేశ ప్రయోజనాల కోసం కాదని, వారికి తగిన సమయంలో ప్రజలు తగిన గుణపాఠం చెబుతారని హెచ్చరించారు.

తెలంగాణ ప్రభుత్వం వికలాంగులకు, వితంతువులకు, టోడీ టాపర్లకు, వయోపరిమితిని 65 నుంచి 57 ఏళ్లకు తగ్గించి సీనియర్ సిటిజన్లకు మరింత మందికి ఆర్థిక చేయూతనిచ్చేందుకు ఆసరా పింఛన్లు అందజేస్తోంది. ఈ మేరకు కొత్తగా 10 లక్షల ఆసరా పింఛన్లు మంజూరయ్యాయి. కొత్త ఆసరా పింఛన్లు మంజూరు చేసినందుకు ముఖ్యమంత్రి కే చంద్రశేఖర్ రావుకు కృతజ్ఞతలు తెలిపిన అజయ్ కుమార్.. గతంలో ఖమ్మంలో దాదాపు రెండు లక్షల మంది ఆసరా పింఛన్ లబ్ధిదారులు ఉన్నారని.. ఇప్పుడు 78,000 కొత్త ఆసరా పింఛన్లతో మొత్తం లబ్ధిదారుల సంఖ్య 2.78 లక్షలకు చేరింద‌ని తెలిపారు.

కొత్తగూడెం జిల్లాలో ప్రస్తుతం ఉన్న 48,000 మంది పింఛనుదారులతో పాటు.. కొత్తగా ఆసరా పింఛన్‌ల కింద 28,427 మంది లబ్ధిదారులు ఉన్నారు. అర్హులైన ప్రతి ఒక్కరికీ సామాజిక భద్రత కల్పించాలనేది ముఖ్యమంత్రి నిర్ణయంతో సాధ్యమైందని మంత్రి వివరించారు.

సకల జనుల సర్వే ప్రకారం తెలంగాణలో కోటి కుటుంబాలు ఉండగా.. అందులో 46 లక్షల కుటుంబాలకు ఆసరా పింఛన్లు ఇస్తున్నారు. వారి సంక్షేమానికి పూర్తి బాధ్యత వహించిన ముఖ్యమంత్రికి లబ్ధిదారులు ఎల్లవేళలా రుణపడి ఉండాలని అజయ్‌కుమార్‌ సూచించారు.