ఉమ్మడి నల్గొండలో భారీ వర్షాలు.. లోతట్టు ప్రాంతాలు జలమయం

Low-lying areas in Joint Nalgonda inundated due to heavy rain. శనివారం రాత్రి నుండి ఉమ్మడి నల్గొండ జిల్లాలోని పలు చోట్ల భారీ వర్షాలు కురుస్తున్నాయి. ఇవాళ కూడా చాలా ప్రాంతా

By అంజి  Published on  16 Jan 2022 6:02 AM GMT
ఉమ్మడి నల్గొండలో భారీ వర్షాలు.. లోతట్టు ప్రాంతాలు జలమయం

శనివారం రాత్రి నుండి ఉమ్మడి నల్గొండ జిల్లాలోని పలు చోట్ల భారీ వర్షాలు కురుస్తున్నాయి. ఇవాళ కూడా చాలా ప్రాంతాల్లో ముసురుపట్టింది. కేతేపల్లి, చివ్వెంల, సూర్యాపేట, నల్గొండ, నకరేకల్‌, కట్టంగూర్‌, నూతన్‌కల్‌, నార్కట్‌పల్లి, ఆత్మకూరు.ఎస్‌తో పాటు పలు మండలాల్లో భారీగా వరద నీరు ప్రవహిస్తోంది. సూర్యాపేటలోని శ్రీరామ్‌నగర్‌, మానసనగర్‌, వినాయక్‌నగర్‌, కృష్ణకాలనీ, వీఆర్‌డీఆర్‌ శ్రీనివాస్‌ కాలనీ, గోపాలపురం, ఆర్‌కే గార్డెన్స్‌ కాలనీలు నిన్న రాత్రి నుంచి కురుస్తున్న భారీ వర్షంతో నీటమునిగాయి. చౌదరి చెరువు, ఇరిగేషన్ ట్యాంక్ పొంగిపొర్లడంతో సూర్యాపేటలోని ఎస్‌వీ కాలేజీ వద్ద నాలా తెగిపోవడంతో ఆర్కే గార్డెన్స్ కాలనీలో వరద నీరు చేరింది. శ్రీరామ్ నగర్, మానస నగర్, వినాయక్ నగర్, కృష్ణ కాలనీలోని లోతట్టు ప్రాంతాలు కూడా జలమయమై ప్రాంత వాసులకు అసౌకర్యం కలిగింది.

మున్సిపల్ అధికారులు రంగంలోకి దిగి వరద నీరు నివాస ప్రాంతాలకు చేరకుండా చర్యలు చేపట్టారు. మున్సిపల్ కమిషనర్ రామాంజనేయులు ఆర్ కే గార్డెన్స్ కాలనీకి చేరుకుని పరిస్థితిని పర్యవేక్షించారు. మునిసిపల్‌ కార్మికులు జేసీబీతో నీటిని తరలించేందుకు మార్గాన్ని తవ్వారు. పొంగిపొర్లకుండా ఉండేందుకు నాలాల నుంచి వ్యర్థాలను కూడా తొలగించారు. ఇదిలా ఉండగా సూర్యాపే పట్టణంలోని జమ్మిగడ్డ సమీపంలోని బ్రిడ్జిపై నాలా వాగు దాదాపుగా ప్రవహిస్తోంది. గడిచిన 24 గంటల్లో జిల్లాలో సూర్యాపేట మండలంలో అత్యధికంగా 145.8 మి.మీ వర్షం కురిసింది. జిల్లాలోని మిగిలిన 17 మండలాల్లో ఓ మోస్తరు నుంచి తేలికపాటి వర్షం కురిసింది. సూర్యాపేట పట్టణంలో దాదాపు 12 సెంటీమీటర్ల వర్షపాతం నమోదైంది. నల్గొండ జిల్లాలోని కట్టంగూర్ మండలంలో కూడా పలు నీటిపారుదల చెరువులు పొంగిపొర్లుతున్నాయి. మరో వైపు భారీ వర్షాల నేపథ్యంలో ప్రజలు అందరూ అప్రమత్తంగా ఉండాలని మంత్రి జగదీష్‌ రెడ్డి విజ్ఞప్తి చేశారు.

Next Story
Share it