మహిళా సంక్షేమానికి సీఎం కేసీఆర్ పెద్దపీట : బాల్క సుమన్

ముఖ్యమంత్రి కేసీఆర్‌ మహిళల సంక్షేమానికి పెద్దపీట వేస్తున్నారని ప్రభుత్వ విప్ బాల్క సుమన్ అన్నారు. బుధవారం చెన్నూరులో కల్యాణలక్ష్మి పథకంలో 357 మంది లబ్ధిదారులకు ఒక్కొక్కరికి రూ.1,00,116 చెక్కులను ఆయన అందజేశారు. ఆర్థికంగా వెనుకబడిన తల్లిదండ్రులకు ఈ పథకం వరం లాంటిదని, వారి కుమార్తెల పెళ్లిళ్లు చేయడంలో ఉపశమనం కలిగిస్తోందని సుమన్ అన్నారు. ఈ కార్యక్రమం ద్వారా ఇప్పటి వరకు చెన్నూరు అసెంబ్లీ నియోజకవర్గంలో 11 వేల మంది తల్లిదండ్రులు లబ్ధి పొందారని తెలిపారు.

సెగ్మెంట్‌లో 12,259 మంది ఒంటరి మహిళలు, 789 మంది వితంతువులు ఆసరా పింఛన్లు పొందుతున్నారని తెలిపారు. చెన్నూరులో రూ.10కోట్లతో మాతా శిశు ఆస్పత్రిని ఏర్పాటు చేస్తున్న‌ట్లు తెలిపారు. మందమర్రి, రామకృష్ణాపూర్, చెన్నూరు ప‌ట్ట‌ణాల‌లో ఒక్కొక్క మహిళా భవన్‌ను రూ.2 కోట్ల ఖ‌ర్చుతో నిర్మిస్తున్నట్లు వెల్ల‌డించారు. అసెంబ్లీ సెగ్మెంట్‌లో నాలుగు ఆరోగ్య మహిళా కేంద్రాలను కూడా నిర్వహిస్తున్నట్లు తెలిపారు.