బీజేపీ ముక్త్ భారత్ కు పిలుపును ఇచ్చిన కేసీఆర్

బీజేపీ ముక్త్ భారత్ అంటూ పిలుపును ఇచ్చారు తెలంగాణ ముఖ్యమంత్రి తెలంగాణ ముఖ్యమంత్రి కె. చంద్రశేఖర్ రావు. బీజేపీని గద్దె దించేందుకు నిజామాబాద్ నుండి జాతీయ స్థాయి ఎన్నికల ప్రచారాన్ని ప్రారంభిస్తామని కేసీఆర్ అన్నారు. ''వచ్చే లోక్ సభ ఎన్నికల్లో ఢిల్లీలో బీజేపీయేతర జెండా ఎగరబోతోంది.. 'బీజేపీ ముక్త్ భారత్' నినాదంతో వెళుతున్నాం. 2024 ఎన్నికల్లో మద్దతివ్వండి, తెలంగాణ రాష్ట్రంలో మాదిరిగా రైతులకు ఉచిత విద్యుత్ అందిస్తాం. త్వరలో నిజామాబాద్ నుంచి జాతీయ స్థాయి ఎన్నికల ప్రచారాన్ని మొదలు పెట్టి బీజేపీని ఇంటికి పంపండి'' అని కేసీఆర్ అన్నారు. 2024లో బీజేపీ రహిత ప్రభుత్వాన్ని ఎన్నుకోవాలని నిజామాబాద్ నుంచి పిలుపునిస్తున్నానని, తెలంగాణ రైతాంగం మాదిరే యావత్ భారతదేశ రైతాంగానికి ఉచిత కరెంటు ఇస్తామని హామీ ఇస్తున్నామని తెలిపారు.

దేశం కోసం తెలంగాణ నుంచే పోరాటం చేయాలని.. ఎవరైతే బావుల వద్ద మీటర్ పెట్టాలంటున్నారో, ఎవరైతే రైతులను ఆత్మహత్యలు చేసుకుని చచ్చిపోవాలంటున్నారో వారికే మనం మీటర్ పెట్టాలన్నారు. ఉన్నవి అమ్ముకోవడం తప్ప ఈ మోదీ ఒక్క ప్రాజెక్టు అయినా కట్టాడా? ఒక్క ఫ్యాక్టరీ అయినా పెట్టాడా? అంటూ నిలదీశారు. ప్రతి గ్రామంలో రైతు బిడ్డలు, రైతు సంఘాలు సమావేశమై, ఏ పార్టీ రైతు వ్యతిరేక విధానాలు అవలంబించినా తిప్పికొట్టాలని పిలుపునిచ్చారు. ఈ ప్రభుత్వాన్ని పడగొడతాం, నిన్ను దించేస్తాం అంటున్నారు. ఆనాడు నేనొక్కడ్నే... మీరందరూ కలిస్తే సముద్రమై ఉప్పొంగి తెలంగాణ రాష్ట్రాన్ని తెచ్చుకున్నాం. ఇప్పుడు ప్రజాస్వామ్య, లౌకిక భారతదేశం కోసం కొట్లాడాల్సిన సమయం వచ్చిందని అన్నారు. మరి దేశ రాజకీయాలను మార్చేందుకు ముందుకు వెళదామా? తెలంగాణను ఏ విధంగా బాగు చేసుకున్నామో, దేశాన్ని కూడా అదే రీతిలో బాగు చేసుకుందామన్నారు. ఈ నిజామాబాద్ సాక్షిగా చెబుతున్నా... త్వరలోనే జాతీయ రాజకీయాల్లో ప్రస్థానం ప్రారంభిస్తున్నామన్నారు.

నిజామాబాద్‌లోని జీజీ కళాశాల మైదానంలో నూతన కలెక్టరేట్‌ భవనాన్ని ప్రారంభించేందుకు వచ్చిన కేసీఆర్ బీజేపీపై విరుచుకుపడ్డారు. బహిరంగ సభను ఉద్దేశించి కేసీఆర్ మాట్లాడుతూ.. నిజామాబాద్‌లో ప్రపంచంలోనే అతిపెద్ద నీటిపారుదల ప్రాజెక్టు నిజాం సాగర్‌ ఉందని, కానీ ఏళ్ల తరబడి నీరు అందడం లేదని, తమకు నీరందించాలని నిజామాబాద్‌ కలెక్టరేట్‌ ఎదుట బైఠాయించి ఏళ్ల తరబడి ధర్నాలు చేశామన్నారు. రైతులు, గ్రామాలు, పట్టణ ప్రాంతాలకు నిరంతరం విద్యుత్ సరఫరా చేస్తున్న ఏకైక రాష్ట్రం తెలంగాణ అని కేసీఆర్ పేర్కొన్నారు. దళిత మహిళలకు రూ.10 వేలు ఇస్తున్నామని, 3,600 మంది గిరిజన యువకులు సర్పంచ్‌లుగా పని చేస్తున్నది మా ప్రభుత్వంలోనే అన్నారు.

వ్యవసాయ భూములను కార్పొరేట్లకు అమ్ముతున్న మోదీ

వ్యవసాయ క్షేత్రాలకు విద్యుత్ మీటర్లు కావాలని ప్రధాని నరేంద్ర మోదీ పిలుపునిచ్చిన నేపథ్యంలో మోదీ ప్రభుత్వం ఎందుకు ఇలాంటి పనులు చేస్తుందో పునరాలోచించాలని కేసీఆర్ ప్రజలను కోరారు. బ్యాంకులు, విమానాలు, రైళ్లను అమ్మేశారని, ఇప్పుడు రైతులు జాబితాలో ఉన్నారని... మోదీ వ్యవసాయ భూములను కార్పొరేట్‌ కంపెనీలకు విక్రయించాలని, పనికిరాని ఉచిత పథకాలతో ప్రజలను మోసం చేస్తున్నారని కేసీఆర్ అన్నారు. నిరర్థక ఆస్తుల (ఎన్‌పీఏ) కింద మీరు, మీ మంత్రులు రూ.12 లక్షల కోట్లు కార్పొరేట్‌ కంపెనీలకు ఇచ్చారని, 1.45 కోట్లు రైతులకు ఎందుకు అందించలేకపోతున్నారని ప్రధానిని ప్రశ్నించారు. రైతులకు వ్యతిరేకంగా పనిచేస్తున్న పార్టీలకు వ్యతిరేకంగా రాష్ట్రవ్యాప్తంగా రైతు సంఘాలు నిరసన తెలపాలని కేసీఆర్ కోరారు.

రూ. నిజామాబాద్‌ అభివృద్ధికి 100 కోట్లు మంజూరు

పాత కలెక్టరేట్ భవనాన్ని ఇందూరు కళాభారతి, ఎయిర్ కండిషన్డ్ ఆడిటోరియంగా తీర్చిదిద్దుతామని కేసీఆర్ ప్రకటించారు. అందుకోసం ఆయన రూ.కోటి మంజూరు చేశారు. నిజామాబాద్ అభివృద్ధికి 100 కోట్లు కేటాయించారు. ఎమ్మెల్యే నిధుల కింద ప్రస్తుతం 5 కోట్లు కేటాయించిన ఎనిమిది నియోజకవర్గాలకు అదనంగా 10 కోట్లు కేటాయిస్తున్నట్లు తెలిపారు.