రాష్ట్రంలో కొవిడ్ రూల్స్ అమలుపై హైకోర్టు అసంతృప్తి

రాష్ట్రంలో బహిరంగ ప్రదేశాల్లో భౌతిక దూరం పాటించడం, మాస్క్‌ల నిబంధన అమలుపై తెలంగాణ హైకోర్టు మంగళవారం అసంతృప్తి వ్యక్తం చేసింది. రాష్ట్రంలో కోవిడ్-19 పరిస్థితిపై కోర్టు ఆరా తీసింది. రాష్ట్రంలో కోవిడ్-19 చర్యలు అమలు చేయకపోవడం దురదృష్టకరమని పేర్కొంది. ప్రభుత్వం తప్పుడు లెక్కలు చెబుతోందని పిటిషనర్ తరపు న్యాయవాది కోర్టుకు తెలిపారు. ఇంటింటికి వెళ్లి జరిపిన సర్వేలో దాదాపు 1.70 లక్షల మంది జ్వరంతో బాధపడుతున్నారని గుర్తించారు. ఇది సంక్రమణ వ్యాప్తి యొక్క తీవ్రతను స్పష్టంగా చూపగలదని పిటిష‌నర్ న్యాయవాది చెప్పారు. ఐసోలేషన్ కిట్‌లో పిల్లలకు ఇచ్చే మందులు కూడా లేవని వారు తెలిపారు.

దీనిపై అడ్వకేట్ జనరల్ ప్రసాద్ స్పందిస్తూ.. రాష్ట్రంలో నెలకొన్న పరిస్థితుల ఆధారంగా ప్రభుత్వం సకాలంలో చర్యలు తీసుకుంటోందన్నారు. విచారణ సందర్భంగా.. రాష్ట్ర ప్రజారోగ్య డైరెక్టర్ రాష్ట్రంలో COVID-19 పరిస్థితిపై నివేదికను కూడా సమర్పించారు. వాదనల అనంతరం నిబంధనలను కచ్చితంగా అమలు చేయాలని జీహెచ్‌ఎంసీ, పోలీసు శాఖలను ఆదేశించిన న్యాయస్థానం.. తదుపరి విచారణలో రాష్ట్రంలో నెలకొన్న పరిస్థితులపై వివరణ ఇవ్వాలని ఆరోగ్యశాఖ డైరెక్టర్‌ను ఆదేశించి.. తదుపరి విచారణను జనవరి 28కి వాయిదా వేసింది.