గ్రూప్‌-1 ప్రిలిమినరీ పరీక్ష సజావుగా నిర్వహించేందుకు అన్ని ఏర్పాట్లు చేయండి

ఈ నెల 16న జరుగ‌నున్న‌ గ్రూప్‌-1 ప్రిలిమినరీ పరీక్షకు సంబంధించిన‌ ఏర్పాట్లపై టీఎస్‌పీఎస్‌సీ చైర్మన్‌ డా.బి.జనార్దన్‌రెడ్డి, డీజీపీ మహేందర్‌రెడ్డితో పాటు ప్రభుత్వ ప్రధాన కార్యదర్శి సోమేశ్‌కుమార్‌ జిల్లా కలెక్టర్లు, పోలీస్‌ కమిషనర్లు, ఎస్పీలతో టెలీకాన్ఫరెన్స్‌ నిర్వహించారు. రాష్ట్రవ్యాప్తంగా 1,019 కేంద్రాల్లో 3.8 లక్షల మంది అభ్యర్థులు ప్రిలిమ్స్ పరీక్షలకు హాజరవుతున్నారు. పరీక్షను సజావుగా నిర్వహించేందుకు అన్ని ఏర్పాట్లు చేయాలని కలెక్టర్లను ప్రభుత్వ ప్రధాన కార్యదర్శి సోమేశ్‌కుమార్ ఆదేశించారు. స్ట్రాంగ్‌రూములు ఏర్పాటు చేసి తగిన పోలీసు రక్షణ ఏర్పాటు చేయాలని అన్నారు.

కలెక్టర్లు అన్ని లైన్ డిపార్ట్‌మెంట్లతో సమావేశం నిర్వహించి పరీక్షా కేంద్రాల వద్ద తాగునీరు, పారిశుధ్యం తదితర అన్ని ఏర్పాట్లు ఉండేలా చూడాలన్నారు. స్ట్రాంగ్ రూమ్ ఇంచార్జ్‌లు, రూట్ ఆఫీసర్లు, లైజన్ ఆఫీసర్లు, అసిస్టెంట్ లైజన్ ఆఫీసర్లు, చీఫ్ సూపరింటెండెంట్లు TSPSC ఇచ్చిన చెక్ లిస్ట్ ప్రకారం సూచనలకు కట్టుబడి ఉండేలా చూసుకోవాలని ఆదేశించారు. టీఎస్ పీఎస్సీ కార్యాలయంలో ప్రత్యేక కంట్రోల్ రూం కూడా ఏర్పాటు చేయనున్నారు. అన్ని జిల్లా కేంద్రాలలో 16/10/2022 తేదీ ఉదయం 10.30 నుండి మధ్యాహ్నం 1.00 గంటల వరకు జరగాల్సిన ప్రిలిమినరీ ప‌రీక్ష‌ (ఆబ్జెక్టివ్ టైప్) హాల్ టిక్కెట్‌లు కమిషన్ వెబ్‌సైట్ https://www.tspsc.gov.inలో అందుబాటులో ఉన్నాయి.

గ్రూప్‌-1 ప్రిలిమినరీ పరీక్షల కోసం తొలిసారిగా ప్రవేశపెట్టిన బయోమెట్రిక్ ఫీచర్‌పై అభ్యర్థులకు అవగాహన కల్పించేందుకు విలేకరుల సమావేశం ఏర్పాటు చేయాలని ప్రభుత్వ ప్రధాన కార్యదర్శి సోమేశ్‌కుమార్‌ కలెక్టర్లను ఆదేశించారు. అభ్యర్థులను హాల్ టిక్కెట్లను డౌన్‌లోడ్ చేసుకోమని చెప్పాలి. చివరి నిమిషంలో ఆలస్యం జరగకుండా ఉండేందుకు నిర్ణీత సమయానికి చాలా ముందుగానే పరీక్ష సమయానికి చేరుకోవాలని వారికి చెప్పాలని సూచించారు.