కేటీపీఎస్‌ కార్మికుల హామీని నెరవేర్చండి.. సీఎంకు రేవంత్ బహిరంగ లేఖ

పాల్వంచలోని కొత్తగూడెం థర్మల్‌ పవర్‌ స్టేషన్‌ (కేటీపీఎస్‌)లో కార్మికులను ఆర్టిజన్లుగా నియమిస్తామన్న హామీని నెరవేర్చాలంటూ తెలంగాణ కాంగ్రెస్‌ అధ్యక్షుడు రేవంత్‌రెడ్డి ముఖ్యమంత్రి కేసీఆర్‌కి గురువారం బహిరంగ లేఖ రాశారు. 2008 నుంచి 2013 వరకు ఆరో దశ కేటీపీఎస్‌ నిర్మాణంలో ఏడో దశలో ఉన్న కార్మికులను కేటీపీఎస్‌లో విలీనం చేస్తామని టీఎస్‌ జెన్‌కో, టీఎస్‌ ట్రాన్స్‌కో చైర్మన్‌, మేనేజింగ్‌ డైరెక్టర్‌ (సీఎండీ) డి.ప్రభాకరరావు లిఖితపూర్వకంగా హామీ ఇచ్చారని కేసీఆర్‌ గుర్తు చేశారు.

టీఆర్‌ఎస్‌ ప్రభుత్వం ఎన్నో ఏళ్లు గడుస్తున్నా హామీని నిలబెట్టుకోకపోవడం దురదృష్టకరమని టీపీసీసీ చీఫ్‌ రేవంత్‌ అన్నారు. ఈ విషయాన్ని తెలంగాణ రాష్ట్ర మానవ హక్కుల కమిషన్ దృష్టికి కూడా తీసుకెళ్లానని లేఖలో పేర్కొన్న ఆయన, తెలంగాణ ప్రభుత్వం హామీ ఇచ్చి కార్మికులను మోసం చేస్తోందని మండిపడ్డారు. కార్మికులను వెంటనే ఆర్టిజన్‌లుగా నియమించే ప్రక్రియను ప్రారంభించి వారికి ఉద్యోగ భద్రత కల్పించాలని ప్రభాకర్‌రావును డిమాండ్‌ చేశారు. విద్యుత్ రంగం పై చెప్పుకుంటున్న గొప్ప‌ల వెనుక ఎంతో మంది కార్మికుల క‌ష్టం దాగి ఉంద‌న్నారు.

ఇది సీఎం కేసీఆర్‌ మ‌ర‌చి పోవ‌ద్ద‌ని పేర్కొన్నారు. కార్మికుల శ్రమకు టీఆర్‌ఎస్‌ ప్రభుత్వం ఇచ్చిన బహుమతి మోసం అంటూ ధ్వ‌జ‌మెత్తారు. పాలన ఈ విధంగా ఉంటే కార్మికుల సమస్యను తీర్చెదెవరు? అంటూ రేవంత్‌ ప్ర‌శ్నించారు. కేటీపీఎస్ 6వ దశ నిర్మాణ సమయంలో ఎన్నో ప్రమాదాలు చోటు చేసుకున్నా వాటిని లెక్క చేయకుండా పని చేసిన కార్మికుల కష్టాన్ని విస్మరించడం దారుణమ‌ని పేర్కొన్నారు.