మాజీ ఎమ్మెల్యే రాజయ్య కారు ఢీకొని మహిళ మృతి

బీఆర్ఎస్ మాజీ ఎమ్మెల్యే డాక్టర్ తాటికొండ రాజయ్య కారు ఢీకొని ఓ మహిళ ప్రాణాలు కోల్పోయింది. డ్రైవర్ కారు నడుపుతున్న సమయంలో మాజీ ఎమ్మెల్యే కూడా అందులోనే ఉన్నారు. ప్రమాదం జరిగిన అనంతరం ఆయన అక్కడి నుండి వెళ్లిపోయారు.

వరంగల్ కాశీబుగ్గ ప్రాంతానికి చెందిన కలకోట స్వప్న(40) ఉపాధి కోసం కాజీపేట మండలం మడికొండ ప్రాంతానికి వచ్చి కొంతకాలంగా నివాసం ఉంటోంది. ఇక్కడే రోజువారీగా కూలీ పనులకు వెళ్తూ కుటుంబాన్ని పోషించుకుంటోంది. శనివారం సాయంత్రం ఆమె కూలి పని ముగించుకుని ఇంటి వెళ్తోన్న క్రమంలో కాజీపేట మండలం మడికొండ ఆర్ఎన్ఆర్ గార్డెన్ వద్ద ఎన్ హెచ్-163పై రోడ్డు డివైడర్ దాటుతోంది. అదే సమయంలో ఆ మార్గంలో వచ్చిన తాటికొండ రాజయ్య కారు ఆమెను అతి వేగంగా ఢీకొట్టింది. ఈ ప్రమాదంలో స్వప్న తలకు బలమైన గాయాలు కాగా స్పృహ కోల్పోయి రోడ్డు పక్కన పడిపోయింది. స్థానికులు వెంటనే కుటుంబ సభ్యులకు ఈ సమాచారం చేరవేశారు. బాధితురాలిని సమీపంలో ఉన్న ఆసుపత్రికి తీసుకెళ్లగా డాక్టర్లు అప్పటికే ప్రాణాలు కోల్పోయినట్లు కుటుంబ సభ్యులకు తెలిపారు.