ఐబొమ్మలో సినిమాలు ఫ్రీగా చూశా.. సీపీఐ నారాయణ సంచలన వ్యాఖ్యలు

సీపీఐ నేత నారాయణ సంచలన వ్యాఖ్యలు చేశారు. పైర‌సీ వ్య‌వ‌హారంలో అరెస్టైన‌ ఐబొమ్మ ర‌వి, ఇటీవ‌ల ఎన్‌కౌంట‌ర్‌లో మ‌ర‌ణించిన మావోయిస్టు అగ్ర‌నేత‌ హిడ్మా ఉదంతాలపై ఆయ‌న స్పందిస్తూ ఈ వ్యాఖ్య‌లు చేశారు.

ఎన్నో తెలివి తేటలున్న ఇమ్మడి రవి అలా మారడానికి కారణం ఈ వ్యవస్థలేన‌న్నారు. ఐ బొమ్మలో తాను కూడా సినిమాలను ఫ్రీగా చూశానని తెలిపారు. ఆరేడు వందలు పెట్టి ఎలా చూసేదని నేను చూశానని పేర్కొన్నారు. వ్యవస్థలో లోపాలను సరి చేయకుంటే ఇలాంటి రవిలే పుట్టుకు వస్తారని చెప్పుకొచ్చారు. ఒకరు మంచి చేస్తే.. మరొకరు చెడు చేస్తారని నారాయణ వ్యాఖ్యానించారు.

ఒక హిడ్మాను చంపితే వెయ్యి మంది హిడ్మాలు పుడుతారని.. అలానే ఒక బొమ్మ రవిని చంపితేనో, జైల్లో వేస్తేనో మరో 100 మంది వస్తారని తెలిపారు. ఐ బొమ్మ రవిని ఉరి తీస్తే ఎలాంటి ప్రయోజనం ఉండదని.. సినిమా మాఫియాను ఉరి తీస్తే సమాజానికి ఉపయోగం ఉంటుందన్నారు. కోట్లు ఖర్చు పెట్టి టికెట్ ధరల కోసం ఆడుక్కుంటారని విమర్శించారు. సామాన్య ప్రజలను దోచుకోవడానికి ఈ ప్రభుత్వం సహాయం చేస్తుందా? అని ప్ర‌శ్నించారు. కోట్లాది రూపాయలు దోచుకుంటున్న వారిని ఐ-బొమ్మ రవి దెబ్బ కొట్టారని పేర్కొన్నారు. ఈ రవి పోతే మరో 100 మంది వస్తారని పోలిసులే చేబుతున్నారు.. వ్యవస్థీకృత లోపాలను సరి చేసుకోవాలని.. ఇలాంటి పరిస్థితి ఉంటే హిడ్మా, రవి లాంటి వారు పుడుతూనే ఉంటారని అన్నారు.