కొడుకుకు 'కేసీఆర్' పేరు పెట్టి అభిమానం చాటుకున్న దంప‌తులు..

రాష్ట్రవ్యాప్తంగా అన్ని వర్గాల ప్రజలు, టీఆర్‌ఎస్ కార్యకర్తలు ముఖ్యమంత్రి కే చంద్రశేఖర్‌రావు జన్మదిన వేడుకలను వినూత్న రీతిలో జరుపుకుంటున్నారు. ఇచ్చోడ మండలం ముఖ్రా(కె) గ్రామంలోని దంపతులు తమ మగబిడ్డకు చంద్రశేఖర్‌రావు పేరు పెట్టి ముఖ్యమంత్రికి కృతజ్ఞతలు తెలిపారు. చంద్రకాంత్ భార్య వాగ్మారే భాగ్యశ్రీ ఇటీవల మగబిడ్డకు జన్మనిచ్చింది. దళిత బస్తీ పథకం కింద మూడు ఎకరాల భూమిని అందించి కుటుంబాన్ని ఆర్థికంగా బలోపేతం చేసినందుకు ముఖ్యమంత్రికి కృతజ్ఞతలు, ప్రేమను తెలియజేస్తూ దంపతులు తమ కుమారుడికి చంద్రశేఖర్ రావు పేరు పెట్టారు.

రాష్ట్ర ప్రభుత్వం అమలు చేస్తున్న వివిధ పథకాల ద్వారా తమ కుటుంబం ఇప్పటి వరకు రూ.22 లక్షల మేర లబ్ధి పొందిందని దంప‌తులు తెలిపారు. కాగా, గ్రామ సర్పంచ్ గాడ్గె మీనాక్షి బాలుడికి అవ‌స‌ర‌మైన‌ వస్తువులు, ఊయల బహుమతిగా అందజేశారు. జన్మదిన వేడుకలను పురస్కరించుకుని వ్యవసాయ క్షేత్రాల్లో కేసీఆర్‌ ఫ్లెక్సీ పోస్టర్లకు యాగం, క్షీరాభిషేకం నిర్వహించారు. రాష్ట్ర ప్రభుత్వం గత ఏడేళ్లలో చేపట్టిన కార్యక్రమాల వల్ల సామాజికంగా అభివృద్ధి చెందడమే కాకుండా అనేక కుటుంబాలు ఆర్థికంగా బలోపేతం అయ్యాయని గ్రామ సర్పంచ్ మీనాక్షి పేర్కొన్నారు.