జర్నలిస్టులకు ఇళ్ల స్థలాలు.. శుభవార్త చెప్పిన సీఎం రేవంత్

తెలంగాణలోని జర్నలిస్టుల చిరకాల స్వప్నమైన ఇళ్ల స్థలాల వ్యవహారంపై ముఖ్యమంత్రి ఎ. రేవంత్ రెడ్డి కీలక హామీ ఇచ్చారు. అంతర్జాతీయ మహిళా దినోత్సవం సందర్భంగా మహిళా జర్నలిస్టులను సన్మానించిన ఆయన, ఈ సందర్భంగా జర్నలిస్టుల ఇళ్ల స్థలాల సమస్యను త్వరలోనే పరిష్కరిస్తామని స్పష్టం చేశారు. అనేక ఏళ్లుగా పెండింగ్‌లో ఉన్న జర్నలిస్టుల ఇళ్ల స్థలాల అంశంపై ముఖ్యమంత్రి సానుకూలంగా స్పందించారు. న్యాయపరమైన చిక్కుల వల్ల ఈ ప్రక్రియలో ఆలస్యం జరగడంపై ఆయన సానుభూతి వ్యక్తం చేశారు.

భవిష్యత్తులో ఎటువంటి న్యాయపరమైన లేదా పరిపాలనా పరమైన ఇబ్బందులు తలెత్తకుండా, శాశ్వత పరిష్కారం చూపేలా ప్రభుత్వం కట్టుబడి ఉందని సీఎం హామీ ఇచ్చారు. ముఖ్యమంత్రి ప్రకటనను జవహర్‌లాల్ నెహ్రూ జర్నలిస్ట్ హౌసింగ్ సొసైటీ స్వాగతించింది. సమస్యను సానుకూల దృక్పథంతో పరిష్కరిస్తామన్నందుకు ముఖ్యమంత్రికి కృతజ్ఞతలు తెలిపింది.

సొసైటీ అధ్యక్షుడు ఆర్. రవికాంత్ రెడ్డి, ఉపాధ్యక్షుడు నేమాని భాస్కర్, డైరెక్టర్ శ్రీకాంత్ ఒక ప్రకటన విడుదల చేస్తూ.. దాదాపు 1,000 మంది సభ్యులు, వారి కుటుంబాల తరపున ముఖ్యమంత్రికి ధన్యవాదాలు తెలిపారు. ప్రభుత్వం సానుకూలంగా స్పందించినప్పటికీ, కేటాయింపు ప్రక్రియను వేగవంతం చేయాలని సొసైటీ ప్రతినిధులు కోరారు. రెండు దశాబ్దాల క్రితమే డబ్బులు చెల్లించి, ఇళ్ల స్థలాల కోసం ఎదురుచూస్తూ ఇప్పటికే 75 మంది సభ్యులు మరణించారని వారు ఆవేదన వ్యక్తం చేశారు. మరణించిన వారి కుటుంబాలకైనా న్యాయం జరిగేలా త్వరగా స్థలాలను కేటాయించాలని వారు విజ్ఞప్తి చేశారు.