'జట్టులో నా టైం ముగిసింద‌ని అనిపించింది..'

భారత జట్టు స్టార్ బ్యాట్స్‌మెన్ సంజు సాంస‌న్ రాబోయే ఐపీఎల్‌లో చెన్నై సూపర్ కింగ్స్‌కు ప్రాతినిధ్యం వహించనున్నాడు. ఐపీఎల్ 2026 వేలానికి ముందు సంజును సీఎస్‌కే, రాజస్థాన్ రాయల్స్‌కు ట్రేడ్ చేసింది. సాంస‌న్ తన మాజీ ఫ్రాంచైజీ అయిన రాజస్థాన్ రాయల్స్ గురించి ఒక కీలకమైన విషయాన్ని వెల్లడించాడు.

సంజు సామ్సన్ 2013లో రాజస్థాన్ రాయల్స్‌తో తన ఐపీఎల్ కెరీర్‌ను ప్రారంభించాడు. అతడు రాయల్స్‌కు 11 సీజన్లు ఆడాడు. 2018 నుండి 2025 వరకు ఎనిమిదేళ్లపాటు జట్టులో రెగ్యులర్‌గా కొనసాగాడు. ఈ సంవత్సరం సంజు రాయల్స్‌కు వ్యతిరేకంగా ఆడనున్నాడు.

రాజస్థాన్ రాయల్స్ ఫ్రాంచైజీతో తన ప్రయాణం ముగిసిందని, వారికి వ్యతిరేకంగా ఆడేటప్పుడు భావోద్వేగాలకు లోనుకాబోనని సంజు సాంస‌న్ భావిస్తున్నాడు.

పీటీఐకి ఇచ్చిన ఒక ఇంటర్వ్యూలో సంజు సాంస‌న్ మాట్లాడుతూ.. "రాజస్థాన్ రాయల్స్‌తో ఆడటం నాకు ఇదే మొదటిసారి. కానీ మైదానంలో భావోద్వేగాలు నాపై ఆధిపత్యం చెలాయిస్తాయని నేను అనుకోవడం లేదు. నా సమయం ముగిసిపోయిందని భావించడం వల్లే నేను రాజస్థాన్ రాయల్స్‌ను విడిచిపెట్టాను. ఇప్పుడు, వారితో ఆడినప్పుడు నా అత్యుత్తమ ప్రదర్శన ఇవ్వడానికి ప్రయత్నిస్తాను." అని అన్నారు.

చెన్నై సూపర్ కింగ్స్ తమ ప్రారంభ‌ మ్యాచ్‌ మార్చి 30న రాజస్థాన్ రాయల్స్‌తో ప్రారంభించనుంది. రాజస్థాన్ రాయల్స్ సీఎస్‌కే నుంచి ఆల్‌రౌండర్ రవీంద్ర జడేజాను ట్రేడ్ చేసుకోగా, చెన్నై సూపర్ కింగ్స్ ఆర్ఆర్ నుంచి శాంసన్‌ను సొంతం చేసుకుంది. ఈ రెండు జట్ల మధ్య ఇది ​​ఒక ఉత్కంఠభరితమైన పోరుగా నిలుస్తుందని భావిస్తున్నారు.

సంజు సాంస‌న్ అద్భుతమైన ఫామ్‌లో ఉండటంతో ప్రస్తుతం CSK అభిమానులు ఆనందంతో ఉప్పొంగిపోతున్నారు. ఇటీవల ముగిసిన T20 ప్రపంచ కప్ 2026లో భారత్ టైటిల్ గెలవడంలో సంజు సామ్సన్ కీలక పాత్ర పోషించాడు.

అతడు టోర్నమెంట్‌లో అత్యధిక పరుగుల స్కోర్ చేసిన బ్యాట్స్‌మెన్ జాబితాలో రెండవ స్థానంలో ఉన్నాడు. అతను ఐదు మ్యాచ్‌లలో 80.25 సగటు, 199.37 స్ట్రైక్ రేట్‌తో మూడు అర్ధశతకాలతో సహా 321 పరుగులు సాధించాడు. వర్చువల్ క్వార్టర్-ఫైనల్స్, సెమీ-ఫైనల్స్, ఫైనల్‌లో సంజు మ్యాచ్ గెలిపించే అర్ధశతకాలు సాధించాడు.

చెన్నై సూపర్ కింగ్స్‌ను రికార్డు స్థాయిలో ఆరో ఐపీఎల్ టైటిల్‌కు నడిపించాలని సంజు సామ్సన్ లక్ష్యంగా పెట్టుకున్నాడు. గత సీజన్‌లో నిరాశాజనకంగా ప్రదర్శన చేసి, సీఎస్‌కే చివరి స్థానంలో నిలిచింది. సామ్సన్ అద్భుతమైన ఫామ్‌లో ఉండగా, ధోనీ జట్టులో ఉండటంతో, 'ఎల్లో బ్రిగేడ్' ఐపీఎల్ టైటిల్‌ను లక్ష్యంగా పెట్టుకుంది.