కొత్త ఇన్నింగ్స్ ప్రారంభించిన టీమ్ ఇండియా బ్యాటర్..ప్రియురాలితో ఘనంగా నిశ్చితార్థం

టీమ్ ఇండియా బ్యాటర్ పృథ్వీ షా తన ప్రియురాలు ఆకృతి అగర్వాల్‌తో నిశ్చితార్థం చేసుకున్నట్లు ఆదివారం సోషల్ మీడియా వేదికగా ప్రకటించారు. "మైదానంలో సిక్సర్ల నుండి జీవితాంతం కలిసి సాగే ఇన్నింగ్స్ వరకు.. తనే నా పర్ఫెక్ట్ ఇన్నింగ్స్" అంటూ పృథ్వీ షా షేర్ చేసిన రోమాంటిక్ ఫోటోలు ప్రస్తుతం నెట్టింట వైరల్ అవుతున్నాయి.

లక్నోకు చెందిన ఆకృతి అగర్వాల్ సోషల్ మీడియా ఇన్‌ఫ్లుయెన్సర్‌గా, నటిగా గుర్తింపు పొందారు. ఇటీవల అర్జున్ టెండూల్కర్ వివాహ వేడుకలో ఈ జంట కలిసి సందడి చేయగా, ఇప్పుడు అధికారికంగా ఉంగరాలు మార్చుకున్నారు. ఈ సందర్భంగా పృథ్వీ షాకు అభిమానులు, తోటి క్రికెటర్లతో పాటు ఐపీఎల్ టీమ్ ఢిల్లీ క్యాపిటల్స్ శుభాకాంక్షలు తెలిపింది.

మరోవైపు పృథ్వీ షా క్రికెట్ కెరీర్ ప్రస్తుతం ఒడిదుడుకులతో సాగుతోంది. 2018లో అరంగేట్రం టెస్టులోనే సెంచరీ బాది సంచలనం సృష్టించినా, ఆ తర్వాత క్రమశిక్షణారాహిత్యం, ఫిట్‌నెస్ సమస్యలు మరియు పేలవ ఫామ్ కారణంగా జట్టులో చోటు కోల్పోయారు. 2024 అక్టోబర్‌లో ముంబై రంజీ జట్టు నుండి కూడా ఆయన్ని తప్పించారు.

ఐపీఎల్ 2026 వేలంలో మొదట ఎవరూ ఆసక్తి చూపకపోయినా, చివరి నిమిషంలో ఢిల్లీ క్యాపిటల్స్ రూ. 75 లక్షల బేస్ ప్రైస్‌కు ఆయన్ని సొంతం చేసుకుంది. నిశ్చితార్థం చేసుకున్న ఈ శుభవేళ, ఐపీఎల్ 2026 ద్వారా తన కెరీర్‌ను మళ్ళీ గాడిలో పెట్టుకోవాలని పృథ్వీ షా భావిస్తున్నారు.