నా కెరీర్‌కు కూడా ముగింపు తేదీ ఉంది.. రిటైర్మెంట్‌పై కోహ్లీ సంచ‌ల‌న‌ కామెంట్స్‌

రాయల్ ఛాలెంజర్స్ బెంగళూరు స్టార్ బ్యాట్స్‌మెన్ విరాట్ కోహ్లీ ఐపీఎల్‌లో దూసుకుపోతున్నాడు. మైదానంలో కోహ్లి ఆటను చూడాలని అభిమానులు ఎప్పుడూ కోరుకుంటారు. అయితే విరాట్ కోహ్లీ క్రికెట్ నుంచి రిటైర్మెంట్ తీసుకుంటే ఏమవుతుంది అనే ప్రశ్న కూడా అభిమానుల మదిలో మెదులుతోంది. విరాట్ ఒక ఇంటర్వ్యూలో తన రిటైర్మెంట్ గురించి బహిరంగంగా మాట్లాడాడు. ఎటువంటి పశ్చాత్తాపం చెందకుండా తన కెరీర్‌లో ప్రతిదీ చేయాలని కోరుకుంటున్నట్లు చెప్పాడు.

తన రిటైర్మెంట్ గురించి విరాట్ కోహ్లీ మాట్లాడుతూ.. ఆటగాడిగా నా కెరీర్‌కు కూడా ముగింపు తేదీ ఉంది. మైదానంలో ప్రతి రోజూ నా జట్టు కోసం నా బెస్ట్ ఇవ్వాలనుకుంటున్నాను. ఏ రోజు నేను చేయలేన‌ని భావించి నా కెరీర్‌ని ముగించాలని అనుకోను. ప్రతి రోజు ఒకేలా ఉండదు. నా పని అయిపోతుంది. నేనూ వెళ్లిపోతాను. ఆ తర్వాత కొంత సమయం వరకు మీరు నన్ను చూడలేరు. కొన్ని పనులు అసంపూర్తిగా వదిలేసినందుకు నేను చింతించకూడదనుకుంటున్నాను. నేను ఆడినంత కాలం నా సర్వస్వం ఇవ్వాలనుకుంటున్నాను. ఇలా ఆలోచిస్తూ ముందుకు సాగుతున్నాను.

ఐపీఎల్ 2024లో విరాట్ కోహ్లి బ్యాట్ నుంచి ప‌రుగుల వ‌ర‌ద పారుతుంది. ఈ సీజన్‌లో ఇప్పటివరకు అత్యధిక పరుగులు చేసిన ఆటగాడు విరాట్. విరాట్ 13 మ్యాచ్‌ల్లో 661 పరుగులు చేశాడు. ఈ సీజన్‌లో కోహ్లీ బ్యాట్‌ నుంచి ఒక్క సెంచరీ కూడా నమోదైంది. తద్వారా ఐపీఎల్‌లో అత్యధిక సెంచరీలు చేసిన ఆటగాడిగా కూడా విరాట్ నిలిచాడు. ఒక ఫ్రాంచైజీకి 250 కంటే ఎక్కువ మ్యాచ్‌లు ఆడిన ఆటగాడిగా కూడా విరాట్ కోహ్లీ నిలిచాడు. ప్ర‌స్తుతం మే 18న CSKతో జ‌రుగ‌నున్న మ్యాచ్‌పై విరాట్ దృష్టి ఉంది.