సీఆర్పీఎఫ్ బంకర్‌పై బాంబు విసిరిన మహిళ.. వీడియో వైరల్

జమ్ము కశ్మీర్‌లోని బారాముల్లా జిల్లా సోపోర్ ప‌ట్ణంలోని సీఆర్పీఎఫ్ బంక‌ర్‌పై మంగ‌ళ‌వారం ఓ గుర్తు తెలియ‌ని మ‌హిళ బాంబు దాడి చేసింది. బుర్ఖా ధరించి వచ్చిన మహిళ తన బ్యాగులో ఉన్న బాంబును బయటకు తీసి క్యాంపు వైపు విసిరి పరారైంది. వెంట‌నే అప్ర‌మ‌త్త‌మైన సీఆర్పీఎఫ్ సిబ్బంది మంటలను ఆర్పివేశారు. అయితే.. అదృష్ట వ‌శాత్తు ఈ దాడిలో ఎటువంటి ప్రాణ‌, ఆస్తి న‌ష్టం వాటిల్ల‌లేదు. ఈ ఘ‌ట‌న‌కు సంబంధించిన మొత్తం దృశ్యాలు సోష‌ల్ మీడియాలో వైర‌ల్‌గా మారాయి.

సీఆర్పీఎఫ్ బంకర్‌పై బాంబు విసిరిన మహిళను గుర్తించామని కశ్మీర్ జోన్ ఐజీ విజయ్ కుమార్ చెప్పారు. త్వ‌ర‌లోనే ఆ మ‌హిళ‌ను అరెస్ట్ చేయ‌నున్న‌ట్లు వెల్ల‌డించారు. మ‌రిన్ని వివ‌రాలు తెలియాల్సి ఉంద‌ని.. విచారణ తర్వాత మొత్తం వివ‌రాల‌ను వెల్ల‌డిస్తామ‌న్నారు.

మరోవైపు శ్రీనగర్ లోని రైనావారి ప్రాంతంలో ఈ రోజు తెల్ల‌వారుజామున జరిగిన ఎన్ కౌంటర్ లో లష్కరే తొయిబాకు చెందిన ఇద్దరు ముష్కరులను భద్రతా దళాలు మట్టుబెట్టాయి.