ఢిల్లీ నుంచి లండన్‌కు వెళుతున్న విమానం.. ఇంతలో..!

ఢిల్లీ నుంచి లండన్‌కు బయలుదేరిన విస్తారా విమానానికి బాంబు బెదిరింపు రావడంతో ఫ్రాంక్‌ఫర్ట్‌కు మళ్లించాల్సి వచ్చింది. ఫ్రాంక్‌ఫర్ట్ విమానాశ్రయంలో సురక్షితంగా విమానం ల్యాండ్ అయిందని, తప్పనిసరి తనిఖీలు నిర్వహిస్తున్నట్లు విమానయాన సంస్థ ప్రతినిధులు తెలిపారు. భద్రతా ఏజెన్సీలు క్లియర్ చేసిన తర్వాత విమానం గమ్యస్థానానికి చేరుకుంటుంది. "అక్టోబర్ 18, 2024న ఢిల్లీ నుండి లండన్‌కు నడుపుతున్న విస్తారా ఫ్లైట్ UK17కి సోషల్ మీడియాలో సెక్యూరిటీ బెదిరింపులు వచ్చాయి. ప్రోటోకాల్‌కు అనుగుణంగా, సంబంధిత అధికారులందరికీ వెంటనే సమాచారం అందించారు. ముందు జాగ్రత్త చర్యగా, పైలట్‌లు విమానాన్ని ఫ్రాంక్‌ఫర్ట్‌కు మళ్లించాలని నిర్ణయించుకున్నారు. "అని విస్తారా ఎయిర్ లైన్స్ ప్రతినిధి చెప్పారు.

శుక్రవారం బెంగళూరు నుంచి ముంబైకి వెళ్లాల్సిన ఆకాశ విమానానికి బయలుదేరే కొద్దిసేపటి ముందు హెచ్చరికలు అందాయి. "స్థానిక అధికారులు అవసరమైన నిబంధనలను అమలు చేయగా, ప్రయాణీకులందరినీ డిప్లేన్ చేయవలసి వచ్చింది. అసౌకర్యాన్ని తగ్గించడానికి మా బృందం సాధ్యమైన పనులు చేసింది" అని ఎయిర్‌లైన్ ఎక్స్‌లో పోస్ట్‌లో పేర్కొంది. గత కొన్ని రోజులుగా, భారతీయ విమానయాన సంస్థలు నిర్వహిస్తున్న దాదాపు 40 విమానాలకు బాంబు బెదిరింపులు వచ్చాయి, అవన్నీ బూటకమని తేలింది.