10 ఏళ్లు అయ్యిందా.. అయితే ఆధార్ అప్డేట్ తప్పనిసరి
UIDAI urges Aadhaar holders to update documents submitted 10 years ago. న్యూఢిల్లీ: 10 ఏళ్ల క్రితం ఆధార్ కార్డు తీసుకుని ఇప్పటి వరకు ఒక్కసారి కూడా అప్డేట్ చేయకపోతే..
By అంజి
న్యూఢిల్లీ: 10 ఏళ్ల క్రితం ఆధార్ కార్డు తీసుకుని ఇప్పటి వరకు ఒక్కసారి కూడా అప్డేట్ చేయకపోతే.. వెంటనే అప్డేట్ చేసుకోవాలని యూనిక్ ఐడెంటిఫికేషన్‌ అథారిటీ ఆఫ్‌ ఇండియా సూచించింది. ప్రస్తుత కాలంలో మన నిత్య జీవితంలో ఆధార్ కార్డు తప్పనిసరి అయ్యింది. యూనిక్ ఐడెంటిటీని జారీ తర్వాత తమ రికార్డులను ఎప్పుడూ అప్డేట్ చేయని ఆధార్ హోల్డర్లు తమ డేటాబేస్‌లో తమ సమాచారాన్ని సవరించుకోవాలని యుఐడిఎఐ కోరింది. మై ఆధార్ పోర్టల్ ద్వారా ఆన్‌లైన్‌లో లేదా సమీపంలోని ఆధార్ కేంద్రాన్ని సందర్శించడం ద్వారా ఆన్‌లైన్‌లో గుర్తింపు పత్రాలను (గుర్తింపు రుజువు, చిరునామా రుజువు) అప్‌లోడ్ చేయడం ద్వారా ఆధార్ హోల్డర్లు తమ ప్రత్యేక ఐడీ రికార్డులను అప్డేట్ చేసుకోవచ్చని యుఐడిఎఐ ఒక ప్రకటనలో తెలిపింది.
''10 సంవత్సరాల క్రితం ఆధార్‌కార్డు తీసుకున్నవారు. ఈ మధ్య కాలంలో ఎన్నడూ ఆధార్ అప్డేట్ చేయని ఆధార్ నంబర్ హోల్డర్లు వారి పత్రాలను అప్డేట్ చేసుకోవడానికి అర్హులు'' అని ప్రకటన పేర్కొంది. గత దశాబ్దంలో ఆధార్ సంఖ్య భారతదేశంలోని నివాసితుల గుర్తింపుకు విశ్వవ్యాప్తంగా ఆమోదించబడిన రుజువుగా ఉద్భవించింది. కేంద్ర ప్రభుత్వం నిర్వహిస్తున్న 319 సహా 1,100 కంటే ఎక్కువ ప్రభుత్వ పథకాలు, కార్యక్రమాలు, సేవలను అందించడానికి ఆధార్ ఆధారిత గుర్తింపును ఉపయోగిస్తాయి. ఆధార్ కార్డు ద్వారా ప్రభుత్వ సేవలు సులభంగా జరుగుతాయి.
అంతేకాకుండా.. బ్యాంకులు, ఎన్‌బిఎఫ్‌సిలు వంటి అనేక ఆర్థిక సంస్థలు ఆధార్‌ను ప్రామాణీకరించడానికి, వినియోగదారులను సజావుగా ఆన్‌బోర్డ్ చేయడానికి ఉపయోగిస్తాయి. "ప్రస్తుత గుర్తింపు రుజువు, చిరునామా రుజువుతో ఆధార్‌లను అప్‌డేట్‌గా ఉంచుకోవడం దేశ ప్రజలకు ప్రయోజనకరంగా ఉంటుంది" అని యుఐడిఎఐ పేర్కొంది. డాక్యుమెంట్‌లను అప్‌డేట్‌గా ఉంచడం వల్ల జీవన సౌలభ్యం, మెరుగైన సర్వీస్ డెలివరీ, ఖచ్చితమైన ప్రామాణీకరణ సాధ్యమవుతుందని యుఐడిఎఐ తెలిపింది. ఆధార్‌కార్డును పదేళ్ల కోకసారి అప్డేట్ చేసుకోవాలని యుఐడిఎఐ ప్రజలను కోరింది.
