రైలులో మహిళకు వేధింపులు.. ఇద్దరు కాంగ్రెస్ ఎమ్మెల్యేలపై కేసు

రాత్రి పూట రైలులో ప్రయాణిస్తున్న మహిళపై వేధింపులకు పాల్పడినందుకు మధ్యప్రదేశ్‌కు చెందిన ఇద్దరు కాంగ్రెస్ ఎమ్మెల్యేలపై శుక్రవారం పోలీసులు కేసు నమోదు చేశారు. పోలీసులు దాఖలు చేసిన ఎఫ్‌ఐఆర్‌ ప్రకారం.. ఎమ్మెల్యేలు కొత్మాకు చెందిన సునీల్ సరాఫ్, సత్నాకు చెందిన సిద్ధార్థ్ కుష్వాహా గురువారం రేవాంచల్ ఎక్స్‌ప్రెస్‌లోని ఏసీ కోచ్‌లో ప్రయాణిస్తున్నారు. వారు కర్ణిలో రైలు ఎక్కి తాగి ఉన్నారని పోలీసులు తెలిపారు.

పసిపాపతో ప్రయాణిస్తున్న మహిళ ఎమ్మెల్యేల తీరుపై తన భర్తను ఫోన్‌లో అప్రమత్తం చేసింది. ఎమ్మెల్యేలు మద్యం సేవించి మహిళ పట్ల అసభ్య పదజాలం ఉపయోగించారని, తనను వేధించారని మహిళ ఆరోపించింది. ఆమె భర్త రైల్వే మంత్రిత్వ శాఖ, రైల్వే పోలీసులను వరుస ట్వీట్లలో ట్యాగ్ చేశాడు. మహిళ పట్ల అసభ్యంగా ప్రవర్తించినందుకు ఎమ్మెల్యేలపై ఐపీసీ సెక్షన్ 354 కింద పోలీసులు ఎఫ్ఐఆర్ నమోదు చేశారు. ఆమె ఫిర్యాదుతో ప్రయాణం మధ్యలో మహిళ సీటు మార్చబడింది.

రేవా-హబీబ్‌గంజ్‌ రేవాంచల్‌ ఎక్స్‌ప్రెస్‌లో పసిపాపతో వెళ్తున్న మహిళ తన భర్తకు ఎమ్మెల్యేల వేధింపుల గురించి ఫోన్‌లో చెప్పింది. మహిళ భర్త సహాయం కోసం ట్వీట్ చేయడంతో సాగర్ వద్ద రైల్వే పోలీసులు రైలు ఎక్కి మహిళకు సహాయం చేశారని సాగర్ ఇన్‌ఛార్జ్ జనరల్ రైల్వే పోలీస్ పీకే అహిర్వార్ తెలిపారు. ఎఫ్ఐఆర్ గురించి అడగ్గా, సిద్ధార్థ్ కుష్వాహా ఆరోపణ నిరాధారమని చెప్పారు. ''ఆ స్త్రీ శిశువుతో ప్రయాణిస్తోంది కాబట్టి నేను ఆమెకు నా సీటును చాలా మర్యాదగా ఇచ్చాను. సునీల్ జీ ఆమెకు ఆహారాన్ని మర్యాదగా అందించారు. ఆమె ఎందుకు మనస్తాపం చెంది ఫిర్యాదు చేసిందో నాకు తెలియదు'' అని అన్నారు.

వారు ఫిర్యాదు చేసినప్పుడు ఇద్దరు కాంగ్రెస్ శాసనసభ్యులని తమకు తెలియదని, అయితే "కృతజ్ఞతగా పోలీసులు తక్షణమే చర్యలు తీసుకొని నా భార్యకు సహాయం చేశారని" మహిళ భర్త చెప్పారు. జబల్‌పూర్ కంట్రోల్ రూమ్ నుంచి వేధింపుల గురించి తమకు సమాచారం అందిందని అహిర్వార్ చెప్పారు. "ఒక అసిస్టెంట్ సబ్-ఇన్‌స్పెక్టర్, కానిస్టేబుల్ రైలు ఎక్కి మహిళ సీటు మార్చారు. వారు ఆమె స్టేట్‌మెంట్‌ను రికార్డ్ చేసి ఎఫ్‌ఐఆర్ నమోదు చేశారు" అని అహిర్వార్ చెప్పారు.