ఆ ఇద్దరు మహిళా ఉన్నతాధికారులకు ప్ర‌భుత్వం షాక్‌

కర్ణాటకలో ఇద్దరు సీనియర్‌ మహిళా ఉన్నతాధికారిణులు సోషల్‌ మీడియా వేదికగా గొడవకు దిగడం సంచలనంగా మారింది. హస్తకళల అభివృద్ధి సంస్థ ఎండీ, ఐపీఎస్‌ అధికారిణి డీ రూప, దేవాదాయ శాఖ కమిషనర్‌, ఐఏఎస్‌ అధికారిణి రోహిణి సింధూరి ఒకరినొకరు దూషించుకున్నారు. ఈ వ్యవహారాన్ని సీరియస్‌గా తీసుకున్న కర్ణాటక ప్రభుత్వం ఇద్దరు మహిళా ఉన్నతాధికారులను బదిలీ చేస్తున్నట్టుగా ఉత్తర్వులు జారీ చేసింది. ఐఏఎస్ అధికారిణి రోహిణి సింధూరి ప్రస్తుతం రాష్ట్ర ఎండోమెంట్‌ డిపార్ట్‌మెంట్‌ కమిషనర్‌గా బాధ్యతలు నిర్వర్తిస్తుండగా.. ఆ స్థానంలో ఐఏఎస్ అధికారి హెచ్ బసవరాజేంద్రను నియమించింది. రూప కర్ణాటక హ్యాండీక్రాఫ్ట్స్‌ డెవలప్మెంట్‌ కార్పొరేషన్‌ ఎండీగా పని చేస్తుండగా.. ఆ స్థానంలో ఐఏఎస్ అధికారిణి డి భారతిని నియమిస్తూ ఉత్తర్వులు జారీచేసింది. తక్షణమే ఈ నియామకాలు అమల్లోకి వస్తాయని తెలిపింది. ప్రస్తుతానికి రూపకు, రోహిణి సింధూరికి ప్రభుత్వం ఎలాంటి పోస్టింగ్ ఇవ్వలేదు.